فرمان الہی
نماز کے اوقات
اسپیشل اولمپکس الینوئے کےلیے سالانہ فنڈ ریزنگ ایونٹ 2025ء شکاگو ڈکی ڈربی کے موقع پر 82 ہزار سے زائد ربڑ کی بطخیں دریائے شکاگو میں تیرتی نظر آئیں۔
امریکی میڈیا کے مطابق اس تقریب میں تماشائیوں اور شائقین سے 10 ڈالرز کے عطیے کے عوض ایک بطخ گود لینے کی اپیل کی گئی اور پھر ان بطخوں کو دریا میں تیراکی کی دوڑ کے لیے ڈالا گیا تاکہ انہیں گود لینے والوں کو جیتنے پر انعامات مل سکیں۔
منتظمین کے مطابق اس دوڑ کے لیے رکھے گئے انعامات میں ایک شیورلیٹ ٹریل بلیزر کار، ڈھائی ہزار ڈالرز نقد اور ڈبلیو کلب شکاگو کبز کے ٹکٹ شامل تھے۔
منتظمین نے بتایا کہ اس سال کی ڈربی میں 82 ہزار سے زائد ربڑ کی بطخوں نے حصہ لیا، جس سے اسپیشل اولمپکس الینوئے کے لیے تقریباً 6 لاکھ ڈالرز کی رقم جمع ہوئی۔
اسپیشل اولمپکس الینوئے کے صدر اور سی ای او پیٹ بیل ڈیل ویکیو نے اس حوالے سے ایک بیان میں کہا ہے کہ ہر عطیہ اسپیشل اولمپکس الینوئے کے پروگرامز کے لیے مدد کرتا ہے، یہ پروگرام ذہنی معذوری کے شکار افراد کے لیے کھیل، صحت اور قیادت کے ذریعے ترقی، ذاتی بہتری اور باہمی تعلقات کے مواقع فراہم کرتے ہیں۔
اس تقریب میں بطخوں کی دوڑ کے علاوہ لائیو میوزک، فوڈ ٹرکس، تصاویر بنوانے کے مواقع اور دیگر کھیل بھی شامل تھے۔
دوڑ کے بعد بطخوں کو دریا سے نکال لیا گیا اور انہیں اگلے سال کی تقریب میں استعمال کرنے کے لیے محفوظ کر لیا گیا۔
