فرمان الہی
نماز کے اوقات
سندھ حکومت کی جانب سے ’معرکہ حق‘ 78ویں جشن آزادی کی خوشیاں منانے کے لیے جناح میونسپل اسٹیڈیم سکھر میں گرینڈ میوزیکل کنسرٹ کا انعقاد کیا گیا۔
کنسرٹ میں صدر آرٹس کونسل محمد احمد شاہ، پیپلز پارٹی کے سینئر رہنما سید خورشید شاہ، صوبائی وزیر توانائی ناصر حسین شاہ، میئر سکھر ارسلان اسلام شیخ، چیئرمین ڈسٹرکٹ کونسل سکھر سید کمیل حیدر شاہ سمیت سیاسی، سماجی و ثقافتی شخصیات کے علاوہ نوجوانوں نے بڑی تعداد میں شرکت کی۔
عالمی شہرت یافتہ گلوکار راحت فتح علی خان، عاصم اظہر، بلال سعید، حاوی، ینگ اسٹنرز اور شائنہ علی نے شاندار پرفارمنس سے سکھر کی عوام کے دل جیت لیے۔
کنسرٹ میں پاک فوج کے حق میں فلک شگاف نعرے لگائے گئے، اسٹیڈیم میں ’پاکستان زندہ باد‘ کی صدائیں گونجتی رہیں جبکہ شرکاء نے ہاتھوں میں اٹھائے قومی پرچم لہراتے ہوئے وطن سے محبت کا بھرپور اظہار کیا اور سکھر شہر کے ماحول کو ملی جوش و جذبے سے بھر دیا۔
اس موقع پر صدر آر ٹس کونسل محمد احمد شاہ نے خطاب میں کہا کہ سکھر کے شہریوں کا جوش و ولولہ قابلِ دید ہے اور یہ شہر ثقافتی سرگرمیوں میں ہمیشہ بھرپور کردار ادا کرتا ہے، سندھ حکومت کی کاوشوں سے یہ میگا کنسرٹ منعقد کیا گیا جوکہ حیدرآباد میں بھی ہوا اور 13 اگست 2025 کو نیشنل اسٹیڈیم کراچی میں بھی ہونے جارہا ہے۔
انہوں نے مزید کہا کہ پاک فوج نے اپنے سے 100 گناہ بڑے دشمن کو شکست دے کر پاکستان کا سر فخر سے بلند کیا۔
صوبائی وزیر توانائی ناصر حسین شاہ نے کہا کہ میں آپ سب کو اس کنسرٹ میں خوش آمدید کہتا ہوں، ہم اپنے ملک اور قوم سے محبت کرنے والے لوگ ہیں، سکھر کی عوام بہت مہذب ہے۔
میئر سکھر ارسلان اسلام شیخ نے کہا کہ پاک فوج نے پوری دنیا میں اپنی صلاحیتوں کا لوہا منوایا، سکھر کے نوجوانوں کا جذبہ دیکھنے کے قابل یے، یہ نوجوان ہی پاکستان کا نام روشن کریں گے، آج ہم معرکہ حق 78ویں جشن آزادی کا تاریخی جشن منارہے ہیں۔
چیئرمین ڈسٹرکٹ کونسل سکھر سید کمیل حیدر شاہ نے کہا کہ سکھر کی عوام امن، محبت اور خوشی کے پیغام کی سفیر ہے، یہ سکھر کی آواز ہے، کانسرٹ کے اختتام پر آتش بازی کا شاندار مظاہرہ کیا گیا جس سے آسمان رنگ برنگی قمقموں سے جگمگا اٹھا۔
