فرمان الہی
نماز کے اوقات
گلگت بلتستان کے ضلع غذر کے علاقے گوپس میں گلیشیئر پھٹنے سے آنے والے سیلاب نےتباہی مچا دی، پہاڑ پر موجود چرواہے نے گلیشیئر پھٹنے کی گاؤں والوں کو بروقت ٹیلی فون پر اطلاع دے کر انسانی جانیں بچائیں۔
لینڈ سلائیڈنگ کے باعث پہاڑ پر پھنسے چرواہے اور اس کے خاندان کو پاک فوج نے ریسکیو کر لیا، چرواہا بروقت اطلاع نہیں دیتا تو کئی جانیں لینڈ سلائیدنگ کی نذر ہوجاتیں۔
تالی داس میں 30 مکانات ڈوب گئے، شہری بچ گئے، گاؤں والوں کا کہنا ہے کہ گلیشیئر پھٹنے کی بروقت اطلاع پہاڑ پر موجود چرواہے انصار نے ٹیلی فون پر دی، جس پر مقامی افراد نے رات میں ہی فوری گھروں کو خالی کر دیا۔
چرواہے نے شہریوں کی جان تو بچالی، لیکن وہ خود اپنے خاندان کے 6 افراد کے ساتھ پہاڑ کے اوپر پھنس گیا، پاک فوج نے ریسیکو آپریشن کرکے مکینوں کو اطلاع دے کر سیلاب سے بچانے والے چرواہے کو بچا لیا۔
ضلع غذر میں سیلابی صورتحال کے باعث پاک فوج کی امدادی کارروائیاں جاری ہیں، پاک فوج نے سیلاب میں پھنسے افراد کو ریسکیو کرنا شروع کر دیا۔
سیلاب کے باعث راستے بند ہونے سے کئی خاندان محصور ہو گئے تھے، پاک فوج نے متاثرہ علاقے میں ہیلی کاپٹر کے ذریعے فوری ریسکیو آپریشن کیا، پاک فوج کے ہیلی کاپٹرز نے بچوں،خواتین، بزرگوں کو محفوظ مقامات تک پہنچایا۔
ڈپٹی کمشنر کے مطابق، چرواہے اور اس کے خاندان سمیت نالے میں پھنسے 6 افراد اور دیگر 200 لوگوں کو پاک فوج اور ریسکیو اداروں نے بروقت کارروائی کرتے ہوئے ہیلی کاپٹر کے ذریعے محفوظ مقامات پر منتقل کیا۔
تالی داس کے مقام پر لینڈ سلائیڈنگ کے باعث دریائے غذر کا بہاؤ رک گیا، اور دریا نے ایک عارضی جھیل کی شکل اختیار کر لی۔ 6 گھنٹوں کے بعد پانی نے دوبارہ راستہ بنا لیا، جس سے ممکنہ تباہی کا خطرہ کسی حد تک ٹل گیا ہے۔
ڈپٹی کمشنر نے نشیبی علاقوں میں رہنے والوں کو فوری طور پر محفوظ مقامات پر منتقل ہونے کی ہدایت کی ہے۔
