• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

سیلاب کی تباہ کاریوں پر غیر قانونی ہاؤسنگ اسکیموں کے گرد شکنجہ سخت کر دیا: اینٹی کرپشن پنجاب

فوٹو: آن لائن
فوٹو: آن لائن 

ڈائریکٹر جنرل (ڈی جی) اینٹی کرپشن پنجاب سہیل ظفر چٹھہ نے کہا ہے کہ سیلاب کی تباہ کاریوں پر غیر قانونی ہاؤسنگ اسکیموں کے گرد شکنجہ سخت کردیا ہے، راوی اربن ڈیولپمنٹ پروجیکٹ اتھارٹی (روڈا) اور  لاہور ڈیولپمنٹ اتھارٹی (ایل ڈی اے) کو سمن جاری کر دیے گئے ہیں۔

انہوں نے ’جیو نیوز‘ سے ٹیلیفونک گفتگو کرتے ہوئے کہا کہ سیلاب کی تباہ کاریوں پر غیر قانونی ہاؤسنگ اسکیموں کے گرد شکنجہ سخت کر دیا  گیا ہے، روڈا اور ایل ڈی اے کو سمن جاری کر دیے گئے، دونوں محکموں سے ہاؤسنگ اسکیموں کا ریکارڈ طلب کر لیا گیا۔

ڈائریکٹر جنرل محکمہ اینٹی کرپشن سہیل ظفر چٹھہ کا کہنا ہے کہ دریائے راوی کے اطراف بنائی گئی ہاؤسنگ اسکیموں کا ریکارڈ منگوا لیا گیا ہے،  ایک نجی ہاؤسنگ اسکیم کے مالک کو گرفتار کر لیا ہے، اس ہاؤسنگ سوسائٹی کے بنانے میں ایل ڈی اے افسران بھی ملوث ہیں، ہاؤسنگ سوسائٹی کے مالک پر 8 ارب روپے دبئی منتقل کرنے کا الزام ہے، 11 ہزار کنال کی یہ غیر قانونی ہاؤسنگ اسکیم ٹھوکر کے نزدیک بنائی گئی ہے۔

سہیل ظفر چٹھہ کا کہنا ہے کہ تحقیقات کا دائرہ کار وسیع کر دیا ہے، سادہ لوح افراد کو غیر قانونی ہاؤسنگ اسکیموں سے پیسے واپس دلائیں گے، وزیرِ اعلیٰ پنجاب مریم نواز کا ویژن ہے کہ کرپشن میں ملوث سرکاری افسر کے خلاف سخت کارروائی کی جائے۔

قومی خبریں سے مزید