فرمان الہی
نماز کے اوقات
پاکستان اور بحرین نے انسداد دہشت گردی کے شعبے میں تعاون بڑھانے کا فیصلہ کرلیا۔
بحرین کے وزیر داخلہ لیفٹیننٹ جنرل راشد بن عبداللّٰہ الخلیفہ اسلام آباد میں وزارت داخلہ پہنچے اور وفاقی وزیر سینیٹر محسن نقوی سے ملاقات کی۔
ملاقات میں وزیر مملکت برائے داخلہ طلال چوہدری، سیکریٹری داخلہ، اسپیشل سیکریٹری داخلہ، ڈی جی اے این ایف، کمانڈنٹ این پی اے، چیف کمشنر اور آئی جی اسلام آباد موجود تھے۔
اس دوران پاکستان اور بحرین کے وزرائے داخلہ کے درمیان وفود کی سطح پر مذاکرات ہوئے اور دوطرفہ تعلقات، انسداد منشیات، انسداد دہشت گردی اور کوسٹ گارڈز پر تبادلہ کیا گیا۔
ملاقات میں بارڈر سیکیورٹی اور پولیس کے شعبوں میں تعاون بڑھانے اور دونوں ممالک میں تعلق کو مزید مستحکم کرنے کےلیے جوائنٹ ورکنگ گروپ بنانے پر اتفاق کیا گیا۔
اس موقع پر انسداد منشیات، ایکسٹراڈیشن و میوچل لیگل اسسٹنٹس، پولیس ٹریننگ اور اسپیشل بٹالین ٹریننگ کے شعبے میں مفاہمتی یادداشتوں پر دستخط کرنے پر اتفاق ہوا۔
محسن نقوی اور راشد بن عبداللّٰہ الخلیفہ کی ملاقات میں دونوں ممالک نے انسداد دہشت گرد، انسداد منشیات اور امیگریشن کے شعبے میں تعاون بڑھانے اور مزید مضبوط کرنے پر اتفاق کیا گیا۔
دوران گفتگو محسن نقوی نے کہا کہ انسداد منشیات کے شعبے میں تعاون نہایت اہمیت کا حامل ہے، یہ ہماری آنے والی نسلوں کے مستقبل کا معاملہ ہے۔
انہوں نے کہا کہ اینٹی نارکوٹکس فورس (اے این ایف) محدود وسائل کے باوجود قابل ستائش کام کر رہی ہے، جس نے 146 ملین ڈالر کی تاریخ کی سب سے بڑی ریکوری کی۔
وفاقی وزیر داخلہ نے مزید کہا کہ اجلاس سے انسدادِ منشیات کے شعبے میں مشترکہ لائحہ عمل تیار کرنے میں مدد ملے گی، بحرین کی جانب سے اپنے سفارت خانے میں ڈرگ لائژن آفیسر کی تعیناتی خوش آئند ہے۔
اُن کا کہنا تھا کہ بحرین میں 1 لاکھ 20 ہزار سے زائد پاکستانی دونوں ممالک کی ترقی میں قابل قدر کردار ادا کررہے ہیں۔
بحرینی وزیر داخلہ نے کہا کہ بحرین پاکستان کے ساتھ برادرانہ تعلقات کو انتہائی اہمیت دیتا ہے، پاکستان کے ساتھ تمام شعبوں تعلقات کو آگے بڑھانے کے خواہاں ہیں۔
انہوں نے کہا کہ جوائنٹ ورکنگ گروپ اور ایم او یوز سےدونوں ممالک میں تعاون کو فروغ ملے گا۔
