فرمان الہی
نماز کے اوقات
میچ ریفری اینڈی پائی کرافٹ کی تبدیلی کے معاملے پر ڈیڈ لاک برقرار ہے۔
ذرائع کے مطابق پی سی بی اپنے مؤقف پر قائم ہے اور بال آئی سی سی کورٹ میں ہے۔
ذرائع نے کہا کہ انٹرنیشنل کرکٹ کونسل (آئی سی سی) نے فیصلہ کر کے اعلان کرنا ہے، ریفری پائی کرافٹ کو ہٹانے کا پاکستان کا مطالبہ مانے جانے پر ہی آج میچ ہو گا۔
پاکستان کرکٹ بورڈ کو تاحال آئی سی سی کی جانب سے کوئی حتمی جواب نہیں ملا ہے، ریفری تبدیلی کی تصدیق نہ ہوئی تو پاکستان ٹیم اسٹیڈیم روانہ نہیں ہوگی۔
محسن نقوی پی سی بی آفیشلز سے مسلسل رابطے میں ہیں، صورتحال کا جائزہ لے رہے ہیں۔
ذرائع کے مطابق ریفری اینڈی پائی کرافٹ کی معذرت کی صورت میں معاملہ ختم ہو سکتا ہے۔
واضح رہے کہ ایشیا کپ میں آج پاکستان اور متحدہ عرب امارات کے میچ سے پہلے متنازع میچ ریفری اینڈی پائی کرافٹ کو تبدیل نہ کرنے پر پاکستان کرکٹ بورڈ (پی سی بی) نے انٹرنیشنل کرکٹ کونسل (آئی سی سی) کو دوبارہ خط لکھا اور سخت مؤقف اختیار کر لیا۔
ذرائع کے مطابق پی سی بی نے مطالبہ تسلیم نہ ہونے کی صورت میں بائیکاٹ کا مؤقف برقرار رکھنے کا پیغام دے دیا۔
تمام تر تحفظات دور ہونے اور مطالبہ تسلیم کرنے کے باضابطہ اعلان کے بعد پاکستان کھیلنے کیلئے رضامندی ظاہر کرے گا۔
واضح رہے کہ گزشتہ روز بھارتی کرکٹ ویب سائٹ نے دعویٰ کیا تھا کہ انٹرنیشنل کرکٹ کونسل (آئی سی سی) نے پاک بھارت میچ کے ریفری اینڈی پائی کرافٹ کو ہٹانے کی پاکستان کی درخواست مسترد کردی تھی۔
پاکستان نے ہینڈ شیک کے معاملے میں آئی سی سی کو میچ ریفری اینڈی پائی کرافٹ کو ایشیا کپ سے ہٹانے کا مطالبہ کیا تھا۔
یاد رہے کہ 15 ستمبر کو پاکستان نے بھارت کے خلاف میچ میں اپنائے جانے والے رویے پر سخت ایکشن لیتے ہوئے ریفری تبدیل نہ کرنے کی صورت میں ایشیا کپ کے مزید میچز نہ کھیلنے کا فیصلہ کیا تھا۔
