فرمان الہی
نماز کے اوقات
گلوبل صمود فلوٹیلا پر سوار ماحولیاتی کارکن گریٹا تُھنبرگ کا اسرائیلی گرفتاری کے بعد ریکارڈ کیا گیا بیان جاری کردیا گیا۔
اپنے بیان میں گریٹا کا کہنا ہے کہ اگر آپ یہ ویڈیو دیکھ رہے ہیں تو اس کا مطلب ہے مجھے میری مرضی کے بغیر اسرائیلی فوج نے اغوا کر لیا ہے۔
گریٹا تُھنبرگ نے کہا کہ ہمارا انسانی ہمدردی کا مشن، عالمی قانون کے مطابق پرتشدد نہیں تھا، سوئیڈن کی حکومت ان کے اور ان کے ساتھیوں کی فوری رہائی کا مطالبہ کرے۔
یاد رہے کہ "گلوبل صمود فلوٹیلا" درجنوں ممالک سے تعلق رکھنے والے رضاکاروں کے ساتھ غزہ کے محاصرے کو توڑنے اور امداد پہنچانے کے لیے روانہ ہوا تھا، جسے اسرائیلی بحریہ نے روک لیا۔
غزہ امداد لے جانے والی کشتیوں کے قافلے گلوبل صمود فلوٹیلا پر اسرائیلی فوج نے دھاوا بول دیا اور تمام کشتیوں کو قبضے میں لے لیا۔
سوئیڈش ماحولیاتی کارکن گریٹا تُھنبرگ سمیت 200 سے زائد کارکن گرفتار کرلیے گئے، اسرائیلی فورسز نے کشتیوں کا مواصلاتی نظام اور براہ راست ویڈیو نشریات جام کر دیں، جنگ زدہ علاقے سے تقریباً 70 ناٹیکل میل دوری پر اسرائیلی بحریہ نے فلوٹیلا کا گھیراؤ کیا۔
صمود فلوٹیلا کے قافلے میں شامل عرب صحافی حسن مسعود نے سوشل میڈیا پر دعویٰ کیا ہے کہ ایک کشتی مکینو (Mikeno) غزہ کی سمندری حدود میں داخل ہو چکی ہے۔
صمود فلوٹیلا کی کشتیوں پر سابق سینیٹر مشتاق احمد سمیت 500 سے زیادہ افراد سوار ہیں۔
پاک فلسطین فورم نامی تنظیم نے دعویٰ کیا ہے کہ سینیٹر مشتاق کو بھی گرفتار کر لیا گیا ہے۔ تاہم آزادانہ ذرائع سے اس کی تصدیق نہیں ہوسکی ہے۔
