فرمان الہی
نماز کے اوقات
بنگلادیش میں 44 سال بعد اسلامی چھاترو شبر کے حمایت یافتہ سومپریتر سکھارتھی جوٹ پینل نے چٹاگانگ یونیورسٹی کے سینٹرل اسٹوڈنٹس یونین کے انتخابات میں تاریخی کامیابی حاصل کرلی۔
بنگلادیشی میڈیا کے مطابق پینل نے چٹاگانگ یونیورسٹی سینٹرل اسٹوڈنٹس یونین کے انتخابات میں نائب صدر، جنرل سیکریٹری سمیت 22 عہدوں پر تاریخی کامیابی حاصل کی۔
نائب صدر کے عہدے پر شبر کے حمایت یافتہ امیدوار ابراہیم رونی نے 7,983 ووٹ لے کر کامیابی حاصل کی، جبکہ ان کے قریب ترین حریف، چھاترو دل کے امیدوار سجاد حسین نے 4,374 ووٹ حاصل کیے۔
اسی طرح جنرل سیکریٹری کے عہدے پر شبر کے امیدوار سید بن حبیب نے 8,031 ووٹ لے کر واضح برتری حاصل کی، جب کہ چھاترو دل کے ایم ڈی شفاعت حسین کو 2,734 ووٹ ملے۔
دوسری جانب اسسٹنٹ جنرل سیکریٹری کے عہدے پر چھاترو دل کے حمایت یافتہ ایوب الرحمان توفیق کامیاب ہوئے، جنہیں 7,014 ووٹ ملے، جب کہ ان کے مدمقابل سجاد حسین منہّا نے 5,045 ووٹ حاصل کیے۔
خیال رہے کہ اسلامی چھاترو شبر نے آخری مرتبہ 1981ء میں چٹاگانگ یونیورسٹی میں طلبہ یونین کے انتخابات جیتے تھے، جب جاسم الدین سرکار نائب صدر اور عبدالغفار جنرل سیکریٹری منتخب ہوئے تھے، دونوں چٹاگانگ یونیورسٹی میں شبر کے رہنما تھے۔
اس کے تقریباً 10 سال بعد 8 فروری 1990ء کو چھٹا یونین الیکشن ہوا تھا، جس کے بعد 35 سال تک کوئی الیکشن منعقد نہیں ہوا۔
اس بار کل 908 امیدواروں نے سی یو سی ایس یو اور ہال یونین کے انتخابات میں حصہ لیا، جن میں سے 415 نے 26 مرکزی عہدوں اور 493 نے 14 ہال یونین عہدوں کے لیے انتخاب لڑا۔
