فرمان الہی
نماز کے اوقات
ڈاکٹر علی اعظم، چنگدو، چین
موجد: تین سال ہوگئے، انٹیلیکچوئل پراپرٹی آفس میں پیٹنٹ کی درخواست دی، مگر کوئی پیش رفت نہیں ہوئی۔
دفتر: درخواست زیرِ التوا ہے۔
موجد: کیا وجوہ ہو سکتی ہیں؟
دفتر: ایگزامینیشن رپورٹس بھیجی گئیں، لیکن آپ کی طرف سے کوئی جواب نہیں آیا۔
موجد (حیرانی سے): مَیں نے تو کوئی ڈاک وصول نہیں کی۔
دفتر: آپ کا پتا دیہات کا ہے، شاید اِسی لیے ڈاک نہیں پہنچی۔ پتا تبدیل کروا لیں۔
موجد: فوراً پتا تبدیل کرنے کی درخواست جمع کروائی۔
٭٭٭٭٭٭
چھے ماہ بعد:
موجد: ایک ڈاک ملی ہے، مگر اس کے ساتھ رپورٹ منسلک نہیں تھی۔
دفتر: آپ ہمارے دفتر تشریف لائیں۔
موجد دفتر پہنچا۔
دفتر کا اسسٹنٹ: مہربانی فرما کر مالی معاونت فرمائیں، رپورٹس ابھی جاری ہوجائیں گی۔
موجد: رپورٹس حاصل کیں اور چند دن بعد جوابات جمع کروائے۔
دفتر: انتظار فرمائیں یہ رپورٹس ایگزامینر کو ارسال کردی جائیں گی۔
٭٭٭٭٭٭
ایک سال بعد:
موجد نے بالآخر دفتر سے رابطہ کیا۔
دفتر: آپ کی درخواست نظرِثانی میں ہے۔ ہم آپ کو رپورٹس بھیج چُکے ہیں۔
موجد (حیرت کے ساتھ): مجھے کوئی رپورٹس موصول نہیں ہوئیں۔
دفتر: آپ دفتر آ کر رپورٹس حاصل کر لیں۔
موجد دفتر پہنچا۔
دفتر کا اسسٹنٹ: مہربانی فرما کر مالی معاونت فرمائیں، رپورٹس ابھی جاری ہو جائیں گی۔
موجد: رپورٹس حاصل کیں اور چند دن بعد جوابات جمع کروائے۔
دفتر: انتظار فرمائیں، یہ رپورٹس ایگزامینر کو ارسال کردی جائیں گی۔
موجد نے گہری سانس لی اور خُود سے کہا۔ ’’یہ ایجاد لاحاصل ہے‘‘۔
