فرمان الہی
نماز کے اوقات
سندھ ہائی کورٹ نے اسلام آباد ہائی کورٹ کے سابق جج طارق محمود جہانگیری کی ڈگری کے معاملے پر توہین عدالت کی درخواست میں وی سی اور رجسٹرار جامعہ کراچی نے جوابی حلف نامے جمع کروا دیے۔
وائس چانسلر جامعہ کراچی پروفیسر خالد عراقی اور رجسٹرار پروفیسر عمران کے خلاف توہین عدالت کی درخواست کی سماعت ہوئی۔
رجسٹرار جامعہ کراچی کی جانب سے کہا گیا ہے کہ اسلام آباد ہائی کورٹ ڈگری کے معاملے پر حتمی فیصلہ سنا چکی ہے، توہین عدالت کی درخواست غیر مؤثر ہوچکی ہے، خارج کی جائے۔
رجسٹرار کا کہنا ہے کہ سندھ ہائی کورٹ نے 3 اکتوبر کے فیصلے کے بعد کوئی کارروائی شروع نہیں کی، جامعہ کراچی نے عدالتی احکامات کے مطابق کوئی احکامات یا نوٹیفکیشن جاری نہیں کیا۔ اسلام آباد ہائی کورٹ نے ایچ ای سی کے ذریعے جامعہ کراچی کا ریکارڈ طلب کیا تھا۔
وائس چانسلر جامعہ کراچی نے کہا کہ اسلام آباد ہائی کورٹ کے احکامات کے مطابق ریکارڈ بغیر کسی ردوبدل کے عدالت میں پیش کیا گیا۔
عدالت نے طارق محمود جہانگیری کے وکیل کو فریقین کے جواب وصول کرنے کی ہدایت کر دی۔
جسٹس یوسف علی سعید نے کہا کہ اس بینچ کا آج آخری دن ہے، تعطیلات کے بعد روسٹر کے مطابق بینچ سماعت کرے گا۔
عدالت نے آئندہ سماعت تک حکم امتناع میں توسیع کرتے ہوئے توہین عدالت کی درخواست کی سماعت سردیوں کی تعطیلات کے بعد تک ملتوی کر دی۔
