فرمان الہی
نماز کے اوقات
اگر یہ کہیں کہ سال 2025 پاکستانی شوبز انڈسٹری میں شادیوں کا سال رہا تو غلط نہ ہوگا۔
سال کے آغاز میں اداکارہ کبریٰ خان اور اداکار گوہر رشید کی شادی سے شروع ہونے والا شادیوں کا سیزن گزشتہ روز اداکار ضرار خان کے نکاح تک جاری رہا۔
جہاں سال بھر متعدد معروف اداکاروں اور سوشل میڈیا انفلوئنسرز نے رشتۂ ازدواج میں منسلک ہو کر نئی زندگی کا آغاز کیا، وہیں چند شخصیات نے اچانک نکاح یا منگنی کا اعلان کر کے سب کو حیران کر دیا۔
ذیل میں 2025 میں شادی، نکاح یا منگنی کرنے والی پاکستانی مشہور شخصیات کی فہرست پیش کی جا رہی ہے۔
پاکستانی شوبز انڈسٹری کی مقبول جوڑی اداکارہ کبریٰ خان اور اداکار گوہر رشید نے رواں سال کے آغاز میں اپنی شادی کا اعلان کیا اور فروری میں مکہ مکرمہ میں نکاح کے بندھن میں بندھے۔ بعدازاں کراچی میں شادی کی دیگر تقریبات منعقد ہوئیں، جنہیں اہلِ خانہ اور قریبی دوستوں کی موجودگی نے یادگار بنا دیا۔
خوبرو اداکارہ ماورا حسین اور اداکار امیر گیلانی بھی رواں سال فروری میں شادی کے بندھن میں بندھ گئے۔ دوستی سے رشتۂ ازدواج تک پہنچنے والی اس جوڑی کو مداحوں کی جانب سے بے پناہ محبت ملی۔ ان کی شادی کی تقریبات سادگی اور خوبصورتی کا حسین امتزاج تھی۔
پاکستانی اداکار نیلم منیر نے دبئی میں مقیم آفیسر محمد راشد سے اچانک شادی کا اعلان کر کے مداحوں کو حیران کر دیا۔ ابتدا میں ان کے شوہر کی شہریت سے متعلق قیاس آرائیاں ہوئیں، تاہم وہ پاکستانی ہیں۔ اداکارہ نے شادی کی دلکش جھلکیاں مداحوں کے ساتھ شیئر کیں۔
نوجوان اداکارہ حریم سہیل، جو سینئر اداکارہ بینا چوہدری کی صاحبزادی ہیں، نے سال 2025 میں اپنے قریبی دوست سے شادی کی۔ اہلِ خانہ اور دوستوں کی موجودگی میں سادہ مگر پُر وقار تقریب منعقد ہوئی۔
باصلاحیت پاکستانی اداکار احمد علی اکبر کی شادی سال کی بڑی شوبز شادیوں میں شمار کی گئی۔ اداکار نے کانٹینٹ کری ایٹر ماہِم بتول سے نکاح کیا۔ نجی تقریب کے بعد شادی کی تصاویر منظرِ عام پر آئیں، جنہیں مداحوں نے بے حد سراہا۔
پاکستانی ڈرامہ سیریل ’مائی ری‘ سے شہرت کی بلندیوں کو چھونے والی، انڈسٹری کی ابھرتی ہوئی اداکارہ نین سکھ نے بھی سال 2025 کے آغاز میں شادی کی۔ ان کی شادی کی تصاویر اور ویڈیوز کو مداحوں کی جانب سے خوب پذیرائی ملی۔
پاکستانی سپر ماڈلز سبحان عمئیس اور عبیر اسد خان نے اچانک اپنی شادی کا اعلان کرکے ہر ایک کو حیران کر دیا، ان کی شادی کی تصاویر نے سوشل میڈیا پر خوب دھوم مچائی۔ تاہم چند ماہ بعد ہی دونوں کے درمیان علیحدگی ہو گئی، جس نے مداحوں کو افسردہ کر دیا۔
پاکستانی اداکار اور بزنس مین سکندر رضوی، جو ملکۂ ترنم نور جہاں کے نواسے ہیں، نے کراچی میں ہسپانوی خاتون آئرین سے شادی کی۔ تقریب میں شوبز شخصیات اور قریبی عزیزوں نے شرکت کی۔
اداکار و ماڈل عمر شہزاد اور ماڈل شانزے لودھی نے بھی مکہ مکرمہ میں نکاح کیا، جس کے بعد کراچی میں شادی کی دیگر تقریبات کا انعقاد کیا گیا۔
شوبز انڈسٹری میں بطور ڈانسر قدم رکھنے والی ریحام رفیق نے انڈسٹری میں پہلے وائس اوور آرٹسٹ اور پھر اداکارہ کی حیثیت سے اپنی جگہ بنائی۔ ریحام رفیق نے بھی 2025 میں شادی کر لی۔ ڈرامہ سیریل ’پرورش‘ میں شاندار اداکاری کے بعد ان کی ذاتی زندگی کا یہ خوشگوار لمحہ بھی خبروں کی زینت بنا۔
خوبرو اداکارہ مہرالنسا اقبال نے برطانیہ میں پاکستانی نژاد برطانوی شہری سے شادی کی۔ ان کے شوہر کا تعلق شوبز سے نہیں ہے۔ اداکارہ نے نکاح کا اعلان تصاویر شیئر کرکے کیا۔
پاکستانی معروف وی جے، اینکر اور اداکارہ انوشے اشرف نے 40 بہاریں دیکھنے کے بعد شادی کے بندھن میں بندھ کر ثابت کر دیا شادی کے لیے عمر کی کوئی قید نہیں۔ ان کی شادی کی شاندار تقریب میں قریبی دوستوں اور رشتے داروں نے شرکت کی۔ تاہم برطانوی شہری شہاب رضا سے ان کا نکاح گزشتہ برس ہو چکا تھا، شادی کی تقریبات ترکیہ میں منعقد ہوئیں۔
پاکستانی مرحوم لیجنڈری اداکار طلعت حسین کی صاحبزادی و اداکارہ تزئین حسین نے 2025 میں اپنے پرانے دوست امیر سیدین سے دوسری شادی کی۔ مداحوں نے جوڑے کے لیے نیک تمناؤں کا اظہار کیا۔
پاکستانی مشہور کامیڈین کاشف خان کی صاحبزادی اور ٹک ٹاکر ربیکا خان اور کانٹینٹ کری ایٹر حسین ترین کی شادی کا سلسلہ سال بھر چلتا رہا۔ سال کے آغاز میں منگنی اور پھر وسط میں بات پکی ہوئی، پھر چند ماہ بعد ان کا نکاح ہوا اور گزشتہ ماہ شادی کی دیگر تقریبات منعقد ہوئیں۔
عالمی شہرت یافتہ مشہور گلوکارہ آئمہ بیگ نے معروف پاکستانی برانڈ ’راستہ‘ کے بانی زین احمد سے کینیڈا میں سادگی سے نکاح کیا۔ یوں تو یہ جوڑی اکثر اپنے خوشگوار لمحات مداحوں کے ساتھ شیئر کرتی رہتی ہے، تاہم بار بار سوشل میڈیا سے شادی کی تصاویر آرکایو کرنے کے سبب ان کی علیحدگی کی خبریں بھی زیر گردش رہیں۔
بین الاقوامی سطح پر پاکستان کا نام روشن کرنے والے معروف گلوکار حسن رحیم کی شادی بھی سال 2025 کی مقبول ترین شوبز شادیوں میں شامل رہی۔ انہوں نے شادی کی تقریبات میں اپنی گلگتی ثقافت کو اُجاگر کرتے ہوئے روایتی رقص بھی پیش کیا، جسے مداحوں نے بےحد پسند کیا۔
پاکستانی تھیٹر سے وابستہ اور ڈرامہ انڈسٹری میں اپنی جگہ بنانے میں مصروف اداکارہ فجر شیخ نے بھی اس سال شادی کرلی۔ ڈرامہ قرضِ جاں میں ان کی اداکاری کو خوب سراہا گیا۔
معروف اینکر حنا نیازی نے بھی 2025 میں شادی کر لی۔ ان کی شادی کی تقریبات سوشل میڈیا پر وائرل ہوئیں اور مداحوں کی جانب سے خوب توجہ حاصل کی۔
سوشل میڈیا انفلوئنسر و ابھرتے ہوئے اداکار خاقان شاہنواز اور اداکارہ سبینہ سید نے رواں برس اپنی منگنی کا اعلان ایک دلکش پنجابی تھیم فوٹو شوٹ کے ذریعے کیا، جس نے سب کو حیران کر دیا۔ یہ جوڑا جلد شادی کے بندھن میں بندھ جائے گا۔
پاکستانی ڈرامہ انڈسٹری کی معروف اداکارہ حنا آفریدی اور سوشل میڈیا انفلوئنسر تیموری نے ایک خوبصورت ویڈیو کے ذریعے منگنی کا اعلان کیا۔ یہ جوڑا 16 جنوری 2026 کو شادی کے بندھن میں بندھ جائے گا۔ حنا آفریدی کی ڈھولکی کا سلسلہ پہلے ہی شروع ہوچکا ہے۔
سال ختم ہونے سے قبل ابھرتے ہوئے اداکار ضرار خان بھی سال 2025 میں شادی و نکاح کے بندھن میں منسلک ہونے والوں میں شامل ہوگئے۔ انہوں نے تصاویر شیئر کرکے کاروباری خاتون مومل خان سے اپنے نکاح کا اعلان کر دیا۔ ان کا نکاح 28 دسمبر 2025 کو قریبی دوستوں اور رشتے داروں کی موجودگی میں ہوا۔
