فرمان الہی
نماز کے اوقات
بھارتی ریاست اتر پردیش سے ایک ریٹائرڈ ریلوے ملازم اور اس کی ذہنی معذور بیٹی کو مبینہ طور پر پانچ سال تک قید میں رکھنے اور تشدد کا نشانہ بنانے کا واقعہ سامنے آیا ہے۔
بھارتی میڈیا کے مطابق اس واقعے میں باپ کی موت واقع ہو گئی جبکہ بیٹی انتہائی کمزور حالت میں گھر سے ملی ہے۔
متوفی کی شناخت 70 سالہ اوم پرکاش سنگھ راٹھور کے نام سے ہوئی ہے جو ریلوے میں سینئر کلرک کے عہدے سے ریٹائر ہوا تھا جبکہ اس کی 27 سالہ بیٹی راشمی ذہنی طور پر معذور ہے۔
اوم پرکاش کی اہلیہ کے انتقال کے بعد سال 2016ء میں باپ اور بیٹی ایک الگ مکان میں رہنے لگے تھے، اپنی بیٹی کی دیکھ بھال کے لیے اوم نے دو ملازمین بھی رکھے۔
اوم پرکاش کے بھائی امر سنگھ کا الزام ہے کہ ملازمین نے پورے گھر پر قبضہ کر لیا تھا۔ باپ اور بیٹی کو کمروں میں قید رکھا جبکہ ملازمین خود آرام دہ زندگی گزارتے رہے۔
اوم پرکاش اور اس کی بیٹی کو کھانے پینے اور دیگر بنیادی سہولتوں سے محروم رکھا گیا، جب بھی کوئی رشتہ دار ملنے آتا تو ملازمین بہانے بنا کر واپس بھیج دیتے۔
پیر کے روز جب اوم پرکاش کی موت کی خبر خاندان کو ملی تو رشتہ دار گھر پہنچے جہاں منظر انتہائی خوفناک دکھائی دیا۔
اوم پرکاش کی لاش انتہائی کمزور حالت میں گھر کے ایک اندرونی کمرے میں پڑی تھی جبکہ راشمی کو ایک اندھیرے کمرے میں برہنہ اور نہایت نڈھال حالت میں پایا گیا۔
رشتہ داروں کے مطابق بھوک کی وجہ سے راشمی کا جسم ایک ضعیف شخص جیسا ہو چکا تھا جس کی ہڈیاں نمایاں تھیں۔
ڈاکٹروں نے اسپتال پہنچانے پر اوم پرکاش کو مردہ قرار دیا جبکہ پولیس نے لاش کو تحویل میں لے کر پوسٹ مارٹم کے لیے بھیج دیا۔
اوم پرکاش کے پڑوسیوں کا کہنا ہے کہ وہ ایک باوقار زندگی گزارنے والے انسان تھے جو ہمیشہ صاف ستھرے کپڑوں میں نظر آتے تھے۔
فی الحال راشمی کو خاندان کی نگرانی میں رکھا گیا ہے جبکہ اہل خانہ نے ملزمان کے خلاف سخت ترین کارروائی کا مطالبہ کیا ہے۔
