فرمان الہی
نماز کے اوقات
بالی ووڈ اداکارہ ارچنا سنگھ میں نایاب طبی مرض کمپلیکس ریجنل پین سِنڈروم (CRPS) کی تشخیص ہوئی ہے جس میں مریض شدید اور طویل عرصے تک اعصابی درد میں مبتلا رہتا ہے۔
ارچنا سنگھ کی خراب صحت سے متعلق انکشاف ان کے بیٹے آیوشمن سیٹھی نے انسٹاگرام پر ایک ویڈیو کے ذریعے کیا ہے۔
ایوشمن کے مطابق ان کی والدہ کو یہ بیماری 2025ء میں فلم ’وکی ودیا کا وہ والا ویڈیو‘ کی شوٹنگ کے دوران کلائی میں چوٹ لگنے کے بعد لاحق ہوئی تھی۔ اس بیماری کے باعث ارچنا سنگھ کا ہاتھ مستقل طور پر متاثر ہو گیا ہے۔
ایوشمن کے مطابق شدید درد میں مبتلا ہونے کے باوجود اِن کی والدہ نے فلموں، ویب سیریز میں کام جاری رکھا اور 60 برس کی عمر میں اپنا یوٹیوب چینل بھی شروع کیا ہے۔
سی آر پی ایس مرض کیا ہے؟
ماہرین کے مطابق CRPS ایک دائمی اعصابی درد کی بیماری ہے جس میں چوٹ کے بعد درد معمول سے کہیں زیادہ شدید اور دیرپا محسوس ہوتا ہے حتیٰ کہ زخم ٹھیک ہونے کے بعد بھی درد برقرار رہتا ہے۔
ارچنا سنگھ کی بیماری سے متعلق ڈاکٹرز نے بتایا ہے کہ اس مرض میں اعصابی نظام درد کے سگنلز کو درست طریقے سے کنٹرول نہیں کر پاتا جس کی وجہ سے دماغ اور ریڑھ کی ہڈی مسلسل بڑھا چڑھا کر درد کے پیغامات بھیجتی رہتی ہے۔
ڈاکٹرز کا کہنا ہے کہ CRPS میں درد جلنے یا چبھنے جیسا ہوتا ہے اور ہلکا سا درد یا درجۂ حرارت میں معمولی تبدیلی بھی شدید تکلیف کا باعث بن سکتی ہے۔ اس کے ساتھ متاثرہ عضو میں سوجن، جلد کے رنگ میں تبدیلی، پسینہ زیادہ آنا، اکڑن اور کمزوری جیسی علامات بھی ظاہر ہوتی ہیں۔
ڈاکٹرز کے مطابق ارچنا کو لاحق مرض CRPS جان لیوا نہیں لیکن زندگی بدل دینے والی بیماری ضرور ہے۔ اس بارے میں آگاہی بہت ضروری ہے تاکہ مریض بروقت علاج حاصل کر سکیں۔
