فرمان الہی
نماز کے اوقات
متحدہ قومی موومنٹ (ایم کیو ایم) پاکستان نے کہا ہے کہ وہ سانحہ گل پلازا پر وفاقی اور اعلیٰ سطح تحقیقاتی کمیشن کی تشکیل کے مطالبے پر قائم ہے۔
ترجمان ایم کیو ایم نے کہا ہے کہ کمیشن آف انکوائری ایکٹ 2017 کے تحت اعلیٰ سطح کا تحقیقاتی کمیشن قائم کیا جائے۔
ترجمان ایم کیو ایم کے مطابق سندھ حکومت کی رپورٹ اور ہائیکورٹ کو ارسال خط کا جائزہ لے رہے ہیں۔ مرکزی کابینہ آئینی و قانونی ماہرین سے مشاورت کے بعد مؤقف دیں گے۔
ایم کیو ایم ترجمان کا کہنا تھا کہ متاثرین کو انصاف اور ذمہ داران کو سزا دلوانے تک سکون سے نہیں بیٹھیں گے۔
واضح رہے کہ وزیراعلیٰ سندھ مراد علی شاہ نے سانحہ گل پلازا کی جوڈیشل انکوائری کےلیے چیف جسٹس سندھ ہائیکورٹ کو خط لکھ دیا ہے۔
سندھ کے سینئر وزیر شرجیل انعام میمن نے کہا تھا کہ سندھ حکومت واقعے کی جوڈیشل انکوائری کےلیے چیف جسٹس سندھ ہائی کورٹ کو خط لکھے گی۔
سندھ کے سینئر وزیر شرجیل انعام میمن نے کہا ہے کہ کراچی کے گل پلازا کے معاملے میں ڈائریکٹر سول ڈیفنس اور ہائیڈرنٹ انچارج کے ڈبلیو ایس بی کو معطل کردیا گیا ہے۔
یاد رہے کہ کراچی کی مصروف ترین شاہراہ ایم اے جناح روڈ پر واقع شاپنگ سینٹر گل پلازا پر 17 جنوری کی رات آگ لگ گئی تھی۔
واقعے میں 80 افراد جاں بحق ہوگئے جبکہ ریسکیو کے دوران ایک فائر فائٹر نے بھی اپنی جان کا نذرانہ پیش کیا تھا۔
