فرمان الہی
نماز کے اوقات
چیف آف ڈیفنس فورسز فیلڈ مارشل سید عاصم منیر کا کہنا ہے کہ کشمیر جلد آزادی کی نئی صبح دیکھے گا جو اہلِ کشمیر کی اجتماعی خواہش اور مقدر ہے۔
پاک فوج کے شعبہ تعلقات عامہ آئی ایس پی آر کے مطابق فیلڈ مارشل سید عاصم منیر نے مظفرآباد کا دورہ کیا، جموں و کشمیر یادگار شہداء پر حاضری دی اور پھول رکھے۔
آئی ایس پی آر کے مطابق فیلڈ مارشل سید عاصم منیر نے کشمیر تحریک کے شہداء کی بہادری اور بےلوث قربانیوں کو سراہا، انہوں نے ممتاز شخصیات اور سابق فوجیوں سے گفتگو کرتے ہوئے مقبوضہ کشمیر کے عوام سے مکمل یکجہتی کا اعادہ کیا۔
فلیڈ مارشل نے کہا کہ بھارت کی ریاستی جارحیت اور انسانی حقوق کی سنگین خلاف ورزیاں کشمیریوں کے حوصلے نہیں توڑ سکیں، ہندو توا پر مبنی پالیسیوں کے باوجود کشمیری عوام کی جدوجہد مزید مضبوط ہوئی ہے، پاکستان کشمیریوں کی سیاسی، اخلاقی اور سفارتی حمایت جاری رکھے گا۔
انہوں نے کہا کہ پاکستان عالمی فورمز پر کشمیر کا مقدمہ بھرپور طریقے سے اٹھاتا رہے گا۔
آئی ایس پی آر کے مطابق فیلڈ مارشل سید عاصم منیر نے مسئلہ کشمیر کو اقوام متحدہ کی قراردادوں کے مطابق حل کرنے کی حمایت کی۔
فرنٹ لائن پوسٹ پر گفتگو کرتے ہوئے فیلڈ مارشل نے کشمیر میں تعینات افسران، جوانوں کے جذبے، پیشہ ورانہ معیار اور جنگی تیاریوں کو سراہتے ہوئے کہا کہ مشکل آپریشنل حالات کے باوجود فوج کا بلند حوصلہ قابلِ تحسین ہے۔
سید عاصم منیر نے کہا کہ کسی بھی دشمنانہ قدم کا فوری، مؤثر اور بھرپور جواب دیا جائے گا، پاکستان کی مسلح افواج روایتی اور ہائبرڈ دونوں طرح کے خطرات سے نمٹنے کیلئے مکمل طور پر تیار ہیں۔
آئی ایس پی آر کے مطابق فیلڈ مارشل نے اگلی صفوں پر تعینات جوانوں سے ملاقات کی اور ان کےحوصلے اور فرض شناسی کو سراہا، دورے کے دوران آپریشنل تیاریوں اور ہر سطح پر ہم آہنگی برقرار رکھنے پر زور دیا۔
دورے کے آغاز پر کور کمانڈر راولپنڈی نے سربراہ پاک فوج اور چیف آف ڈیفنس فورسز کا استقبال کیا۔
