فرمان الہی
نماز کے اوقات
ویلنٹائن ڈے کے موقع پر امریکی خلائی ایجنسی ناسا نے ایک خاص خلائی تصویر جاری کی ہے جس میں دل کی شکل کا نیبولا (ستاروں کا جھرمٹ) دکھایا گیا ہے، جہاں نئے ستارے جنم لے رہے ہیں۔
یہ تصویر کوکون نیبولا (IC 5146) کی ہے، جو کہکشاں ملکی وے میں واقع ایک ستارے بنانے والا علاقہ ہے۔ ناسا نے اسے اس دن کے لیے ایک موزوں علامت قرار دیا۔
اس تصویر میں ڈیٹا کو سرخ، سبز اور نیلے رنگوں میں دکھایا گیا ہے، جس سے نیبولا کے اندر سے ابھرنے والے نئے ستاروں کا جھرمٹ نمایاں ہوتا ہے۔ یہ نئے ستارے بہت سرگرم ہیں اور بڑی مقدار میں ایکسریز خارج کرتے ہیں۔
نیبولا کی روشنی مختلف اقسام کی شعاعوں کا مجموعہ ہے۔ کچھ روشنی براہِ راست ان ستاروں سے آتی ہے جبکہ کچھ نیبولا کے اندر موجود گرد و غبار سے منعکس ہو کر واپس آتی ہے۔
تصویر کیسے تیار کی گئی؟
یہ مرکب تصویر مختلف ذرائع سے حاصل شدہ ڈیٹا کو ملا کر بنائی گئی ہے، جہاں آپٹیکل لائٹ کی تصاویر ماہر فلکیات مائیکل ایڈلر اور بیری ولسن نے فراہم کیں۔
ناسا کے وائیڈ فیلڈ انفراریڈ سروے ایکسپلورر (وائز) مشن سے حاصل شدہ انفراریڈ ڈیٹا بھی شامل کیا گیا۔
ان سب کو یکجا کرنے سے نیبولا کا چمکتا ہوا بادل، گھنا گرد و غبار اور اس کے اندر و اردگرد موجود بےشمار ستارے واضح طور پر دکھائی دیتے ہیں۔
کوکون نیبولا کہاں ہے؟
یہ نیبولا تقریباً 15 نوری سال پر محیط ہے جبکہ زمین سے اس کا فاصلہ تقریباً 2,650 نوری سال ہے۔ یہ برج ہنس (Cygnus) کے جھرمٹ میں واقع ہے۔
تصویر میں کیا دکھائی دیتا ہے؟
تصویر میں کوکون نیبولا ایک دل کی شکل والے چمکتے بادل کی صورت میں نظر آتا ہے، جس کے پیچھے ستاروں سے بھرا آسمان پھیلا ہوا ہے۔
مرکزی حصہ سرخ، نارنجی اور سنہری رنگوں میں جگمگا رہا ہے۔ کنارے آہستہ آہستہ خلا میں مدھم ہوتے دکھائی دیتے ہیں۔
اس بادل کے اندر بے شمار نئے ستارے ہیں، کچھ روشن نقطوں کی طرح نظر آتے ہیں جبکہ کچھ صرف ایکس ریز کے ذریعے دکھائی دیتے ہیں۔
یہ تصویر نہ صرف فلکیاتی تحقیق کے لیے اہم ہے بلکہ ویلنٹائن ڈے کے موقع پر کائنات کی خوبصورتی اور محبت کی علامت بھی پیش کرتی ہے۔
