فرمان الہی
نماز کے اوقات
برطانیہ میں اس سال بھی دو مختلف دنوں میں رمضان کا آغاز ہوا ہے، کلینڈر کی تقلید کرنے والوں نے بدھ سے رمضان کا آغاز کردیا جبکہ رویت کے تحت شروع کرنے والے جمعرات سے رمضان کا آغاز کریں گے۔
مرکزی جماعت اہلسنت یوکے و اوورسیز ٹرسٹ نے جمعرات سے آغاز رمضان کا اعلان کیا، جماعت اہلسنت کے رہنما قاضی عبدالعزیز چشتی کا کہنا تھا کہ منگل کو تو کسی صورت بھی رویت ممکن نہیں تھی اور اہلسنت کے کلینڈر کے مطابق تو آج 28 تاریخ ہے۔
موجودہ صورت حال میں خدشہ یہ پیدا ہوگیا ہے کہ عیدیں بھی دو مختلف دنوں میں منائی جائیں گی، بدھ سے رمضان شروع کرنے والی مساجد میں منگل کی شب سے نماز تراویح کا آغاز ہوگیا۔
برطانیہ میں بیشتر سپر مارکیٹس نے مسلم کمیونٹی کیلئے رمضان سے قبل سحر و افطار کی اشیا میں خصوصی رعایتوں کا اعلان بھی کیا ہے۔
دو مختلف دنوں میں رمضان شروع کرنے پر کمیونٹی نے خفگی کا اظہار بھی کیا ہے چند افراد کا کہنا تھا کہ دنیا چاند پر پہنچ گئی ہم آج تک چاند کا مسئلہ ہی حل نہ کرسکے، نئی نسل رویت ہلال کا مسئلہ سمجھنے سے قاصر ہے ان کا کہنا ہے کہ اس جدید دور میں بھی چاند کی پیدائش پر جھگڑا ناقابل فہم ہے۔
