فرمان الہی
نماز کے اوقات
جنوبی لبنان میں اسرائیل اور حزب اللّٰہ کے درمیان جھڑپیں مزید شدت اختیار کر گئیں۔
عرب میڈیا کے مطابق اسرائیلی وزیرِاعظم بنیامین نیتن یاہو نے فوج کو کارروائیاں مزید وسیع کرنے کی ہدایت دے دی ہے جبکہ اسرائیلی افواج دریائے لیتانی کی جانب پیش قدمی کر رہی ہیں جس سے خطے میں کشیدگی مزید بڑھ گئی ہے۔
’الجزیرہ‘ کے مطابق بنیامین نیتن یاہو نے شمالی کمانڈ سے جاری ویڈیو بیان میں کہا ہے کہ اسرائیل شمالی سرحد کی صورتِ حال کو بنیادی طور پر تبدیل کرنا چاہتا ہے اور سیکیورٹی بفرزون کو مزید بڑھایا جائے گا، اسرائیل اس حکمتِ عملی کو غزہ ماڈل کی طرز پر نافذ کرنے کا ارادہ رکھتا ہے۔
’الجزیرہ‘ کے نمائندے عبیدہ حطو کے مطابق جنوبی لبنان کے شہر صور کے قریب لڑائی میں حالیہ گھنٹوں کے دوران نمایاں شدت آئی ہے۔
اسرائیلی فوج قنطرہ کے نزدیک دریائے لیتانی کے معاون دریا تک پہنچ چکی ہے جسے ایک اہم اسٹریٹجک پیش رفت قرار دیا جا رہا ہے، جبکہ حزب اللّٰہ کی جانب سے شدید مزاحمت کی توقع ظاہر کی جا رہی ہے۔
اقوامِ متحدہ کی امن فورس یونیفل نے بتایا ہے کہ جنوبی لبنان کے علاقے عدشیت القصیر میں ایک دھماکے کے نتیجے میں ایک امن اہلکار ہلاک جبکہ دوسرا شدید زخمی ہوا ہے، واقعے کی تحقیقات جاری ہیں۔
