فرمان الہی
نماز کے اوقات
چین میں دنیا کے کچھ انتہائی حیرت انگیز اور متاثر کن انفرااسٹرکچر موجود ہیں، جن میں دریا کے عین درمیان سے گزرنے والی معلق سڑکیں اور تنگ پہاڑی چوٹیوں پر بنی شاہراہیں شامل ہیں۔ لیکن جب خطرناک سڑکوں کی بات آتی ہے تو ووکسی کی 'ٹوکن اسٹون روڈ' جتنی خوفناک سڑک شاید ہی ہو۔
لنگ پیشی جسے ٹوکن اسٹون روڈ کے نام سے بھی جانا جاتا ہے، ایک نہایت تیز چڑھائی اور تنگ بل کھاتی سڑک ہے جس میں 18 حیرت انگیز اور خطرناک یو ٹرن موجود ہیں۔
جنوب مغربی چین کے ووکسی کاؤنٹی میں واقع دو بڑی چٹانوں کے درمیان واقع لنگ پیشی زیگ زیگ روڈ، چھوٹی سی تیان پنگ کمیونٹی کو بیرونی دنیا سے جوڑتی ہے۔
یہ سڑک صرف 3.7 کلومیٹر لمبی ہے، جو تیان پنگ گاؤں سے صوبائی روڈ 201 تک جاتی ہے، جبکہ اس کا زیگ زیگ حصہ صرف 453 میٹر پر مشتمل ہے۔ لیکن یہی مختصر حصہ تجربہ کار ڈرائیوروں کے لیے ایک بڑا چیلنج ثابت ہوتا ہے۔
یہ 2012 میں تعمیر کی گئی اور 2019 میں پختہ کی جانے والی چونگ کنگ کی یہ منفرد زگ زیگ سڑک گاڑیوں کو بہت آہستہ چلنے اور ہر تیز موڑ پر انتہائی احتیاط سے گزرنے پر مجبور کرتی ہے۔
یہ سڑک نہ صرف بے حد تنگ ہے، جس کی وجہ سے واپس مڑنا تقریباً ناممکن ہوتا ہے، بلکہ اس کی سب سے تیزی سے اترتی ڈھلوان پر چڑھائی کی شرح 36 فیصد تک پہنچ جاتی ہے۔
خوش قسمتی سے تیان پنگ کمیونٹی صرف 137 افراد پر مشتمل ہے اور یہاں 37 خاندان آباد ہیں، اس لیے اسے بیرونی دنیا سے ملانے والی یہ زگ زیگ سڑک زیادہ مصروف نہیں رہتی، جس سے ڈرائیوروں کو اس کے خطرناک موڑ زیادہ آسانی سے عبور کرنے میں مدد ملتی ہے۔
