اسلام آباد(نمائندہ خصوصی)پیمراشکایات کونسل اسلام آبادکا اجلاس چیئر پرسن محترمہ شمیم ہمایوں کی زیر ِصدارت پیمرا ہیڈکوارٹرز، اسلام آباد میں منعقدہوا۔ کونسل نے سیکریٹری قومی اسمبلی عبدالجبارعلی کی جانب سےچینل92-کے پروگرام "مقابل" مؤرخہ 06ستمبر 2016ء میں سپیکر قومی اسمبلی پر بغیر ثبوت الزامات لگانے پر شکایت کی سماعت کرتے ہوئے شکایت کنندہ کو ہدایت کی ہے کہ دائر کردہ شکایت کی پیروی کے لیے سپیکر قومی اسمبلی کی تائیدحاصل کریں اور کونسل کے سامنے سپیکر کی نمائندگی کے لیے شکایت کنندہ اتھارٹی لیٹر کے ساتھ اگلے اجلاس میں پیش ہوں۔ مزید کارروائی اگلے اجلاس تک مؤخر کر دی گئی۔کونسل نے سابق اسسٹنٹ لوک ورثہ محمد ارشاد کی چینل92- کے پروگرام "پرائم ٹائم"جس کی میزبان سعدیہ افضال ہیں، میں 04اگست2016ء کو حقائق کے برعکس رپورٹ نشر کرنے پر شکایت کی سماعت کرتے ہوئے شکایت کنندہ کے اجلاس میں پیش نہ ہونے کی وجہ سے کارروائی اگلے اجلاس تک مؤخر کر دی۔ڈاکٹر ایس ایم جنید زیدی ریکٹر کامسیٹس یونیورسٹی کی" آج ٹی وی" کے خلاف دائر درخواست شکایت کنندہ کی جانب سے شکایت واپس لینے کی وجہ سے کونسل نے نمٹا دی۔وفاقی وزیر مملکت برائے صحت سائرہ افضل تارڑ کی اے آر وئی نیوز کے پروگرام "دی رپورٹرزـ" 21جنوری 2016ء میں غلط معلومات نشر کرنے کیخلاف شکایت پر کونسل نے شکایت کنندہ سے مزید تفصیلات اگلے اجلاس تک طلب کرتے ہوئے سماعت اگلے اجلاس تک مؤخر کر دی۔ پیمرا کی طرف سے روہی ٹی وی کی ٹرانسمیشن معطل کرنے پر دیئے گئے اظہار وجوہ نوٹس کی سماعت کرتے ہوئے کونسل نے چینل کی طرف سے جمع کرایا جانے والا جواب پیمرا لائسنسگ ونگ کو ریکارڈ کی تصدیق کے لیے بھجوا دیا۔کونسل نے قائدِ حزبِ اختلاف سید خورشید شاہ کی جانب سے سماء ٹی وی کے خلاف 27جون 2016ء کو بے بنیاد خبر چلانے پر دائر کردہ شکایت کی سماعت کی۔کونسل نے شکایت کنندہ کی جانب سے پیش ہونے والے نمائندے کو ہدایت کی کہ چیف سیکریٹری سندھ کی جانب سے کی جانے والی انکوائری کی حتمی رپورٹ اگلے اجلاس تک جمع کروائیں ۔اجلاس میں دیگر کونسل ممبران محترمہ نزہت فاطمہ، پروفیسر ڈاکٹر مقصود جعفری، ڈاکٹر شاہجہان سید، ہارون رشید اور محمد فاروق(آر جی ایم/سیکرٹری کونسل) بھی موجود تھے۔پیمرا شکایات کونسل اسلام آباد کا آئندہ اجلاس 14اکتوبر کو پیمرا ہیڈ کوارٹرز اسلام آباد میں ہو گا۔
فرمان الہی
نماز کے اوقات
