چارسدہ.........چارسدہ کی باچا خان یونیورسٹی پر حملے میں 20 افراد شہید ہو گئے۔ وزیر اعظم نے سانحہ پر آج ملک بھر میں سوگ کا اعلان کیا ہے۔جس کے بعد قومی پرچم سرنگوں رہے گا۔
یونیورسٹی پر حملہ کرنے والے چار میں سے دو دہشت گردوں کی شناخت کرلی گئی ہے ۔چارسدہ کی باچا خان یونیورسٹی پر حملے کے بعد،تحقیقاتی ادارے کڑی سے کڑی ملاتے ہوئے آگے بڑھ رہے ہیں۔
ذرائع کے مطابق مارے گئے دہشت گردوں کے انگوٹھوں کے نشانات کی نادرا سے تصدیق کی گئی، جس کے بعد دو کی شناخت ہوگئی۔ ایک دہشت گرد کا نام عباس افغانی ہے جسے عباس سواتی بھی کہا جاتا ہے،جبکہ دوسرے دہشت گرد کی شناخت علی رحمان کے نام سے ہوئی۔دیگر دو دہشت گردوں کے ریکارڈ کی نادرا سے تصدیق نہیں ہوسکی، تاہم ان میں سے ایک کی عمر 18سال سے کم بتائی جاتی ہے۔
ذرائع کا کہنا ہے کہ حملہ آوروں کی ٹیلے فون کالز ٹریس کی گئی ہیں، دہشت گرد افغان صوبے ننگر ہار کے قریب کسی سے فون پر رابطے میں تھے۔فرانزک ٹیموں نے بھی شواہد اکٹھے کیے ہیں۔گزشتہ روز4 دہشت گردوں نے چارسدہ میں باچا خان یونیورسٹی میں گھس کر آگ و خون کا کھیل کھیلنا چاہا تھا، دہشت گرد یونیورسٹی کے عقب سے خاردار تاریں کاٹ کر داخل ہوئے ،جن کی فائرنگ سے استاد اور طلبہ سمیت 20 افراد شہید ہوئے۔
مارے گئے دہشت گردوں سے دو خودکش جیکیٹیں، چار دستی بم اور بڑی تعداد میں اسلحہ ملا، جنہیں وہ سیکیورٹی فورسز کی بروقت کارروائی کے باعث استعمال نہ کرسکے۔یونیورسٹی میں باچا خان کی برسی کے موقع پر امن مشاعرہ بھی ہونا تھا جس کے مہمان پہنچ چکے تھے، تاہم سیکیورٹی فورسز نے قوم کو بڑے نقصان سے بچالیا۔
فرمان الہی
نماز کے اوقات
