فرمان الہی
نماز کے اوقات
پاکستان سپر لیگ (پی ایس ایل) تھری کے 17 ویں میچ میں کوئٹہ گلیڈی ایٹرز نے اعصاب شکن مقابلے کے بعد 153 رنز کا ہدف 8 وکٹ کے نقصان پر 19 اعشاریہ5 اوورز میں حاصل کرلیا۔
سرفراز الیون کی تیسری فتح نے ملتان سلطانز کے کپتان شعیب ملک کی 65 رنز کی اننگز اور عمر گل کے پہلے ہی میچ میں 6 وکٹ کی عمدہ پرفارمنس کو بھی رائیگاں کردیا۔
کوئٹہ گلیڈی ایٹرز کی جیت میں حسن خان کے آخری اوور کے چھکے کے ساتھ روسو 27، شین واٹس26، رمیز راجہ 22،اسد شفیق20 رنز نے نمایاں کردار ادا کیا، اس کامیابی کے ساتھ سرفراز الیون پوائنٹس ٹیبل پر چوتھے نمبر پر پہنچ گئی ہے۔
میچ میں ملتان سلطانز کی شکست کی وجہ خراب فیلڈنگ کے ساتھ کئی اہم کیچز کا ڈراپ کیا جانا رہا، اس سے قبل کپتان شعیب ملک کے ناقابل شکست 65،صہیب مقصود 27، سہیل تنویر 19رنز کی بدولت مقررہ 20 اوورز میں 5 وکٹ کے نقصان پر 152رنز بنائے۔
سرفراز الیون کی طرف سے اسد شفق اور شین واٹسن نے اننگز کا آغاز کیا، دونوں ہی کھلاڑیوں نے پہلی وکٹ پر 48 رنز کی شراکت قائم کی اور اس دوران کئی دلکش اسٹروکس کھیلے۔
کوئٹہ گلیڈی ایٹرز کی پہلی وکٹ 48 کے اسکور پر گری، 5 چوکوں لگا کر 26 رنز بنانے والے شین واٹسن کو ایونٹ میں پہلا میچ کھیل رہے عمر گل نے میدان بدر کیا۔
شعیب ملک الیون کو دوسری وکٹ 54 کے اسکور پر مل گئی،4 چوکوں کی مدد سے 20 رنز بنانے والے دوسرے اوپنر اسد شفیق کو بھی عمر گل نے پویلین کا راستہ دکھایا اور میچ کے لئے اپنے انتخاب کو درست ثابت کردیا۔
کوئٹہ گلیڈی کی اہم وکٹ 11 ویں اوور میں 62 کے اسکور پر گری، پیٹرسن (5رنز) کو شعیب ملک نے ایل بی ڈبلیو آئوٹ کیا تو اس مرحلے پر سرفراز الیون مشکلات کا شکار ہوگئی۔
ملتان سلطانز کو چوتھی وکٹ 90 کے اسکور پر ملی،رمیز راجہ جونیئر اور روسو کی 28 رنز کی شراکت عمران طاہر نے توڑی، رمیز راجہ 22رنز بناکر پویلین لوٹ گئے،انہوں نے اس دوران 1 چھکا اور 2 چوکے لگائے۔
کوئٹہ کی پانچویں وکٹ 114 کے اسکور پر گری، عمر گل کی گیند پر سرفراز احمد کا مشکل کیچ شان مسعود نے پکڑا تو ایسا لگا کہ میچ ایک بار پھر ملتان کے ہاتھ میں آگیا ہے۔
شعیب ملک الیون کو چھٹی اور اہم وکٹ 27رنز بنانے والے روسو کی مل گئی،118 کے اسکور پر کوئٹہ کی اننگز کے ٹاپ اسکورر کو عمر گل نے میدان سے واپسی کا راستہ دکھایا۔
ملتان سلطانز کی میچ پر مکمل گرفت دیکھتے ہوئے محمد نواز اور انور علی نے 26 قیمتی رنز کی شراکت قائم کی اور اسکور 144 تک پہنچا دیا تو مقابلہ ایک بار پھر دلچسپ رخ اختیار کرگیا، یہ پارٹنر شپ بھی عمر گل نے توڑی، یہ میچ میں ان کی پانچویں وکٹ تھی۔
اپنے چوتھے اوور کی آخری گیند پر عمر گل نے 1 چھکے اور 1 چوکے کی مدد سے 15 رنز بنانے والے انور علی کو بھی میدان بدر کردیا اور ایونٹ میں پہلی بار 6 وکٹ لینے کا کارنامہ اپنے نام کیا۔
کوئٹہ گلیڈی ایٹرزکو درکار 9 رنز کے دفاع کے لئے ملتان سلطانز کے کپتان نے گیند پولارڈ کے سپرد کی مگر وہ ٹیم کو کامیابی دلانے میں ناکام رہے، یوں سرفراز الیون 153 رنز کا ہدف ایک بال پہلے ہی حاصل کرلیا۔
4 اوورز میں 24 رنز کے عوض 6 وکٹیں لینے والے عمر گل کو میچ کے بہترین کھلاڑی کے ایوارڈ سے نوازا گیا۔
