فرمان الہی
نماز کے اوقات
ہر گزرتے دن کے ساتھ ہماری زندگیوں میں اسمارٹ فونز کا استعمال بڑھتا جارہا ہے جس کے ساتھ انٹرنیٹ کا رجحان بھی پروان چڑھ رہاہے۔ہماری سماجی زندگیوں میں انقلاب برپا ہونے کے ساتھ ہمارے لیے نت نئی موبائل ایپلی کیشنز نے تعلیم کے میدان میں بھی سہولتوں کے کئی نئےدروازے کھول دیے ہیں۔ صدیوں سے سائنس کو سنجیدہ اور اکتادینے والا مضمون قرار دیاجاتا رہا ہے، تاہم ان سائنس ایپس کی بدولت ہم سائنس کے کسی بھی مشکل سوال کا نہ صرف جواب حاصل کرسکتے ہیں بلکہ ان کے ذریعے سائنس کے عملی تجربات سے بھی لطف اندوز ہوسکتے ہیں۔
یوں اس وقت سائنس اور ٹیکنالوجی میں طالب علموں کی بڑھتی دلچسپی اور پاکستان بھر میں سائنس فیئرز کے انعقاد سے ہمارے ذہین سائنس دانوں کا ابھرنا آنے والے دنوں میں پاکستان میں سائنس کلچر کے احیا کی نوید بن کر ابھر رہا ہے۔آئیے ایسی سائنس دوست اینڈرائڈ ایپس سے متعارف ہوتے ہیں جو آپ اپنے اینڈرائڈ اسمارٹ فون پر ڈاؤن لوڈ کرکےچوبیس گھنٹےاپنے تخلیقی و سائنسی ذہن و شعور کو پروان چڑھاسکتے ہیں۔
ناسا ایپ(NASA App)
اینڈرائڈ 4 پر دستیاب یہ مفت ایپ امریکا کے قومی خلائی ادارےناسا کی معلومات سے بھرپور ہے جہاں سے آپ خلا و کائنات کے سربستہ رازوں کی نہ صرف معلومات حاصل کرسکتے ہیں بلکہ کائنات کے مظاہرے کو ناسا ٹی وی لائیو پر براہ راست بھی دیکھ سکتے ہیں۔فلکیات و خلائیات کے عاشقوں کے لیے یہ نایاب تحفہ ہے،جہاں 14ہزارسے زائد تصاویراور ویڈیوز موجود ہیںجن کی تعداد ہر روز بڑھتی رہتی ہے ۔اتناہی نہیں اس حیران کن معلومات کو آپ فیس بک اور ٹوئٹر پر بھی شیئر کرسکتے ہیں۔
ٹچ سرجری(Touch Surgery)
اینڈرائڈ 4.0یا بالاماڈل Kinosis، اسمارٹ فون پر مفت دستیاب یہ ایپ آپ کو سرجری کے براہ راست نظارے سےآشنا کرے گی جہاں آپ مختلف آپریشنز کو حقیقی فرد کو نقصان پہنچائے بغیر ورچوئل دنیا میں ملاحظہ کرسکیں گے۔اسے عام لوگ بھیCognitive Task Simulation کے ذریعے چلا سکتے ہیں۔انسانی جسم کو جاننے اور سرجری کے تجربے سے گزرنے کی یہ حیرت انگیز ایپ ہے۔
اسکائی ویو(Sky View)
اینڈرائڈ 4.0یا بالاپردستیاب یہ ایپ ستارہ شناسی کے رسیاؤں کے لیے انمول ہے۔آپ کو صرف کیمرہ کا رخ آسمان کی طرف کرنا ہوگا ۔دن اور رات سے قطع نظرستاروں کا جھرمٹ اورسیارے باآسانی دیکھے جاسکتے ہیں۔ دن میں تارے دیکھنے سے بھی حظ اٹھا سکتے ہیں۔اس کے ذریعے آپ وقت میں سفر کرکے ماضی کے آسمان کو بھی دیکھ سکتے ہیں۔سب سے دلچسپ بات یہ کہ اس کے لیے آپ کو وائی فائی سگنلز کی بھی ضرورت نہیں پڑے گی۔یہ ایپ ہر حال میں آپ کو فلک کے ماضی و حال اور مستقبل کی سیر کرائے گی۔
برین پوپ(BrainPOP)
اینڈرائڈ2.3اور بالا پر دستیاب اس ایپ کو حاصل کرنے کے لیے آپ کو لگ بھگ£1.20سے £4.22 کے درمیان ادائیگی کرنی ہوگی۔یہاں روزانہ آپ ایک نئی اینی میٹذ فلم دیکھ کر اس کے کوئز شو میں شرکت کرسکتے ہیںجوآپ کے دماغ کی آزمائش ہے۔اس کے مضامین میں سائنس،ریاضی ،ٹیکنالوجی،صحت، موسیقی اور سوشل سائنسز شامل ہیں۔یہ ان طالب علموں اور لوگوں کے لیے مفید ہے جو اپنی معلومات کا امتحان لینا چاہتے ہیں۔
اسٹار چارٹ انفائنائٹ(Star Chart Infinite)
اسکیپسٹ گیمز لمیٹڈ کی جانب سے£1.99 میںدستیاب یہ ایپ مختلف ڈیوائسز پر چلائی جاسکتی ہے جو جی پی ایس ٹیکنالوجی پر استعمال کی جاتی ہے۔اس کے ذریعے آپ تھری ڈی یونیورس یعنی سہہ جہاتی کائنات کو دیکھنے کے ساتھ ستاروں کی اصل جگہ کو دیکھ سکتے ہیں اور نظامِ شمسی میں موجود سیاروں کو قریب سے ملاحظہ کرسکتے ہیں۔اس ایپ سے آپ کہکہشاؤں کی سیر بھی کر سکتے ہیں۔
حیران کن سائنسی حقائق (Amazing Science Facts)
موون کی یہ مفت ایپ اینڈرائڈ4.0 یا بالا ڈیوائس پر چلائی جاسکتی ہے،جو سائنس کے ہزاروں حیران کن حقائق پر مبنی ہے۔اس میں سائنس کے ہرشعبہ کی معلومات کا ذخیرہ ہے۔آپ روزانہ نت نئی معلومات وصول کرنے کے ساتھ اپنی پسند کے تمام حقائق کوسرچ کرنے کا آپشن بھی موجود ہے۔ساتھ ہی فیس بک اور ٹوئٹر پر اپنے دوستوں سے یہ معلومات شیئر بھی کرسکتے ہیں۔اسے چلانے کے لیے بھی آپ وائی فائی کے محتاج نہیں۔
سائنس بینک(Science Bank)
جے ڈی اسٹار کی جانب سے آپ کے لیے بلاقیمت متعارف کردہ یہ سائنس ایپ اینڈرائڈ2.1 اور بالا ڈیوائس کے لیے کارآمد ہے۔اس میں آپ حیاتیات، کیمیا، طبیعیات، خلائیات اور ماحولیات کی دنیاؤں کی خبریں جان سکتے ہیں۔اس میںموجود تصاویر حقائق کو جیتی جاگتی زندگی کا سماں دیتے ہیں۔اتنا ہی نہیں اپنی پسندیدہ تصاویر اور حقائق محفوظ بھی کرسکتے ہیں اور اپنی معلومات کو شامل بھی کر سکتے ہیں۔
برائن کوکس کے مرتب کردہ عجائباتِ کائنات(Brian Cox Wonders Compilation)
ہارپر کولنز پبلشرز لمٹیڈکی جانب سے£2.39قیمت میں دستیاب اس سائنس ایپ کو آپ اینڈرائڈ4.4 اور بالا پر چلاسکتے ہیں۔ اس ایپ میں پروفیسر برائن کوکس آپ کوانتہائی مختصر جوہری ذرات سے بڑی جسامت کے چاند اور کہکشاؤں پر مشتمل سہہ جہاتی کائنات(3D Universe) کی سیر کرائیں گے۔یہ ایپ ان کی کتاب’’ عجائباتِ کائنات‘‘ سے ماخوذ ہے۔یہ کائنات کے بارے میں معلومات کی خوبصورت بیاض ہےجس میں سیاروں،چاندوں،سیاہ شگافوں(black holes) اورستاروں کے بارے میں رہنمائی بھی دی گئی ہے۔کائنات کے اسراروں سے پیار کرنے والوں کے لیے یہ بہترین دستاویز ہے۔
فراری سائنس (Skeptical Science)
شائن ٹیکنالوجیز پرائیویٹ لمیٹیڈ کی اس ایپ کو کسی بھی ڈیوائس پر چلا سکتے ہیں۔ اس کا نام فراری سائنس اس لیے رکھا گیا ہے کہ ہم اس حقیقت سے نظریں چراتے ہیں کہ ہمارا کرہ ارض ہر گزرتے دن کے ساتھ عالمی گرمائش سے دوچار ہو رہا ہے اور یہ موسمیاتی تبدیلی کسی بھی وقت ہمیں تباہ کرسکتی ہے۔یہ ایپ آپ کو گلوبل وارمنگ کے بارے میں قابلِ اعتبار سائنسی معلومات و تحقیق کی روشنی میںحقائق اور اعداد و شمار کا وسیع ذخیرہ دیتی ہے۔
سہہ جہتی دماغ(3D Brain)
ڈی این اے لرننگ سینٹر کی جانب سے پیش کردہ تین سمتوں سے دکھائی دینے والا دماغ دیکھنے کے لیے آپ کے پاس انڈرائڈ1.6ہونا لازمی ہے، جس پر آپ اس ایپ کو فری ڈاؤن لوڈ کرکے مزے لے سکتے ہیں۔ آپ دماغ کے مختلف حصوں کے بارے میں معلومات حاصل کرسکتے ہیں۔ یہ ایپ ذہنی بیماری میں دماغ کے مختلف حصوں کے کردار کے بارے میں بھی معلومات فراہم کرتی ہے ۔ اس کے علاوہ دماغ کے حوالے سے کیس اسٹیڈیزلنک اور نئی تحقیق بھی شامل ہے،جسے نیورو سائنس کے شائقین کے لیے شاندار تحفہ قرار دیا جا سکتا ہے۔
