فرمان الہی
نماز کے اوقات
کراچی(الیکشن سیل) نیب کورٹ سے سزا ملنے کے بعد نوازشریف اور ان کی صاحبزادی مریم نواز جمعہ کے روز وطن واپس لوٹ رہے ہیں۔ اس دن مسلم لیگ ن کی سیاست اور انتخابی مہم کا رخ طے ہوجائے گا کہ کیا مسلم لیگ ن اپنے ووٹرز کو سڑکوں پر لاکر کامیاب شو کرنے میں کامیاب ہوجائے گی۔ اگر ایسا ہوا تو ن لیگ کی انتخابی مہم میں نئے سرے سے جان پڑ جائے گی اور ڈھلوان کی جانب سے جاری رک جائے گا۔ اس لئے جمعہ کا دن ن لیگ کی قیادت اور انتخابی لہر کے لئے فیصلہ کن موڑ ہوگا جو مسلم لیگ ن اور میاں نوازشریف کے مستقبل کی نشاندہی کرے گا۔ اگر ن لیگ پاور شو میں کامیابی حاصل کرے گی تو کارکنوں اور مایوس اور کنفیوژ ووٹرز میں ایک نئی امید کی لہر دوڑے گی اور ن لیگ اپنے بہتر مستقبل کی جانب دیکھ سکے گی۔ کیونکہ سزا سنائے جانے کے بعد سے ن لیگ کا کارکن اور ووٹر مایوس، پریشان اور کنفیوژ ہے کہ پارٹی قیادت کا لائحہ عمل کیا ہوگا۔ جمعہ کا دن اور اس دن کی سیاسی اور احتجاجی حکمت عملی ن لیگ کے ووٹرز کو یہ پیغام دے گی کہ ن لیگ کے پالیسی ساز کیا کرنا چاہتے ہیں۔ ن لیگ کی سیاسی بقا اور مستحکم انتخابی نتائج کا انحصار جمعہ کے دن کی حکمت عملی پر ہوگا۔اگر مسلم لیگ ن جمعہ کے دن اپنے ووٹرز اور کارکنوں کو بہتر منصوبہ بندی سے باہر نہ لاسکی اور شو فلاپ ہونے کا خطرہ ہوا تو یہ ن لیگ کی صفوں میں انتشار پیدا کرے گا اور مایوسی کا شکار کارکن بہتر کارکردگی کی امید چھوڑ بیٹھے گا۔
