فرمان الہی
نماز کے اوقات
اسلام آباد(نمائندہ جنگ)سابق صدر پاکستان اور پاکستان پیپلزپارٹی پارلیمنٹرینز کے صدر آصف علی زرداری نے چیئرمین پیپلزپارٹی بلاول بھٹو زرداری کا شاندار استقبال کرنے پر وسطی پنجاب کے عوام سے اظہار تشکر کیا ہے۔ آصف علی زرداری نے کہا کہ پنجاب میں بلاول کےشاندار استقبال سے مخالفین پریشان ہوگئے،علی موسیٰ گیلانی پر فائرنگ میں ملوث افراد کو گرفتار کیا جائے،الیکشن جیت کر غربت و بیروزگاری ختم کرینگے،بلاول بھٹو زرداری کے شاندان استقبال نے ثبات کر دیا ہے کہ پنجاب پیپلزپارٹی کا تھا، ہے اور ہمیشہ رہے گا۔ بلاول بھٹو کے استقبال سے پیپلزپارٹی کے مخالفین پریشان ہوگئے ہیں۔ شہید بھٹو سے پیار کرنے والا ہر شخص بھٹو کے ساتھ ہے، شہید بینظیر بھٹو کا وفادار بلاول بھٹو زرداری کا وفادار ہے۔ آصف علی زرداری نے پارٹی کارکنوں کو ہدایت کی کہ وہ متحرک رہیں، چیئرمین کا پیغام اور منشور عوام تک پہنچائیں۔انہوں نے کہا کہ غربت، بیروزگاری اور شدت پسندی کا خاتمہ ہمارا مشن ہے۔پیپلزپارٹی انتخابات جیتنے کے بعد غربت، بیروزگاری کو ختم کرکے عوام کے لئے خوشحالی کے دروازے کھولے گی۔ آصف علی زرداری نے کہا کہ پنجاب میں بھٹو کے نعروں کی گونج جیالوں کے لئے فتح کا پیغام ہے۔ پیپلزپارٹی کے مخالفین کو شکست صاف نظر آرہی ہے۔ آصف علی زرداری نے ملتان میں سابق وزیراعظم سید یوسف رضا گیلانی کے صاحبزادے اور پیپلزپارٹی کے امیدوار علی موسیٰ گیلانی پر فائرنگ کے واقعے کی سخت الفاظ میں مزمت کرتے ہوئے کہا ہے کہ واقعے میں ملوث افراد کو گرفتار کیا جائے۔انہوں نے کہا کہ الیکشن کمیشن اور نگران حکومت اس واقعے کا نوٹس لیتے ہوئے فائرنگ کرنے والوں کے خلاف کارروائی کرے۔
