• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

گھر ‘نوکریاں دیے بغیر حکومت کو خلاء میں جانے نہیں دینگے،مریم اورنگزیب

آج کا اخبار
اہم خبریں
07 نومبر ، 2018
اسلام آباد(نمائندہ جنگ) مسلم لیگ ن کی ترجمان مریم اورنگزیب کا کہنا ہے کہ تحریک انصاف کے وزیر فواد چوہدری نے فسادی سیاستدانوں کو خلاء میں بھیجنے کی بات کی تاہم وہ اسپیس شپ کی ڈرائیونگ خود کرنے کے چکر میں ہیں۔ منگل کوسابق وزیر اعظم نواز شریف کی اسلام آباد کی احتساب عدالت پیشی کے موقع پر میڈیا سے گفتگو کرتے ہوئے مریم اورنگزیب نے کہا وفاقی وزیر اطلاعات عادت سے مجبور ہیں، پاکستان کے عوام 50 لاکھ گھر اور ایک کروڑ نوکریاں دیے بغیر انہیں خلاء میں جانے نہیں دیں گے۔ انہوں نے کہا کہ فواد چوہدری اس قسم کے بیانات دے کر راہ فرار اختیار کرنے کی کوشش کر رہے ہیں، انہیں پتہ ہونا چاہیے ان کے بیانات کی سچائی کا عوام کو پتہ چل چکا ہے۔ مریم اورنگزیب نے کہا کہ فواد چوہدری کو خلا میں جانے کی بات نہیں کرنی چاہیے وہ اپنے وعدے پورے کریں، 100 دن مکمل ہونے والے ہیں، مہنگائی کا بم پاکستان کے عوام پر گرایا گیا ہے، بزنس کمیونٹی اور چھوٹے بڑے کاروباری لوگوں کو دشواری ہے۔ترجمان (ن) لیگ نے کہا کہ یہ لوگ مہنگائی کا بوجھ عوام پر ڈال کر پچھلی حکومت پر ڈال رہے ہیں، مہنگائی کا بوجھ موجودہ حکومت کی وجہ سے ہے، فواد چوہدری مہنگائی سے توجہ ہٹانے کی کوشش کرتے ہیں لیکن انہیں توجہ ہٹانے نہیں دی جائیگی۔موجودہ حکومت کی سو روزہ کارکردگی کا انہیں جواب دینا پڑئے گا، بھنسوں سے کتنے ارب قومی خزانے میں اکٹھے کئے ؟چاہیے اب خلا میں جائے چاہیے ملک سے بھاگے انہیں اب ہر بات کا جواب دینا ہوگا ،ن لیگ نے تحریک انصاف کو سو روز تک کی رعایت دی ہوئی ہے،ورنہ ن لیگ ہر روز انکا احتساب کرتی،انہوں نے کہاکہ چین میں کسی قسم کی اسٹرٹیجی لیکر نہیں گئے،تحریک انصاف جتنا عرصہ بھی حکومت میں ہے ن لیگ کی کارکردگی پر بھیک مانگے گی۔
تازہ ترین