فرمان الہی
نماز کے اوقات
کراچی (عبدالماجدبھٹی/ اسٹاف رپورٹر) باکسنگ ڈے ٹیسٹ میں پاکستان کرکٹ ٹیم بدھ سے ہیوی ویٹ جنوبی افریقا کیخلاف سنچورین کے رنگ میں اتریگی۔ میچ سے قبل پاکستانی ٹیم کو اس وقت شدید دھچکا لگا ہے جب مستند مڈل آرڈر بیٹسمین حارث سہیل گھٹنے کی تکلیف میں مبتلا ہوگئے ہیں، میچ میں ان کی شرکت مشکوک ہے۔ اگر بائیں ہاتھ کے حارث سہیل نے میچ میں شرکت نہ کرسکے تو ان کی جگہ اوپنر شان مسعود کھیلیں گے۔ فاسٹ بولر محمد عباس اور لیگ اسپنر شاداب خان پہلے ہی ان فٹ کھلاڑیوں کی فہرست میں شامل ہیں۔ ڈیل اسٹین اور ربادا کے خلاف پاکستانی بیٹنگ کو بڑی آزمائش سے گذرنا پڑے گا۔ پاکستان جنوبی افریقا کے پیس اٹیک کے خلاف تین ریگولر اوپنرز فخر زمان، امام الحق اور شان مسعود کو کھلائے گا ۔ اننگز کا آغاز فخر زمان اور امام الحق کریں گے۔ شان مسعود ون ڈائون پر کھیلیں گے۔ مستقل نمبر تین بیٹسمین اظہر علی چوتھے نمبر پر آئیں گے۔ حارث سہیل چوتھے نمبر پر کھیلتے ہیں۔ حارث سہیل کا ان فٹ ہونا پاکستان ٹیم کے لئے اس لئے بڑا دھچکا ہے کیوں کہ انہوں نے آسٹریلیا کے خلاف دبئی ٹیسٹ میں 110اور نیوزی لینڈ کے خلاف دبئی میں147رنز بنائے تھے۔ ان کی اس اننگز کی بدولت پاکستان نے میچ اننگز سے جیت لیا تھا۔ جنوبی افریقا میں بینونی میں ٹور میچ 73ناٹ آئوٹ رنز بنائے اور پاکستان کی جیت میں اہم کردار ادا کیا تھا۔ ٹیم انتظامیہ کے مطابق 29سالہ حارث سہیل نے گذشتہ دو دن سے پریکٹس سیشن میں میں بھی شرکت نہیں کی۔ حارث سہیل کو دس ٹیسٹ میچوں کا تجربہ ہے اور ان کی عدم شرکت سے مڈل آرڈر بیٹنگ کمزور ہوجائے گی۔ پہلے ٹیسٹ میں اسد شفیق پانچویں ،بابر اعظم چھٹے اور سرفراز احمد ساتویں نمبر پر کھیلیں گے۔ پاکستان کی ممکنہ گیارہ رکنی ٹیم میں تین فاسٹ بولر محمد عامر،حسن علی اور شاہین شاہ آفریدی شامل ہیں جبکہ واحد اسپنرز یاسر شاہ ہوں گے۔ ذرائع کا کہنا ہے کہ ان فٹ محمد عباس اور شاداب خان نے نیٹ پر بولنگ شروع کردی ہے۔ امید ظاہر کی جارہی ہے کہ دونوں تین جنوری سے شروع ہونے والے کیپ ٹائون ٹیسٹ تک فٹ ہوجائیں گے۔ محمد عباس کندھے اور شاداب خان گروئن انجری کا شکار ہیں ۔ فاسٹ بولر ڈیل اسٹین کو جنوبی افریقا کی طرف سے ٹیسٹ میچز میں سب سے زیادہ 422 وکٹوں کا ریکارڈ اپنےنام کرنے کے لیے صرف ایک وکٹ کی ضرورت ہے، وہ اس وقت سابق فاسٹ بولرشان پولاک کے ساتھ 421 وکٹ لے کر برابر پہنچ چکے ہیں۔ ڈیل اسٹین نے فٹنس مسائل کی وجہ سے گذشتہ تین سال میں صرف چھ ٹیسٹ میچ کھیلے ہیں۔ اسٹین نے88اور پولاک نے108ٹیسٹ کھیلے ہیں۔ سپر اسپورٹس پارک کی پچ فاسٹ بولنگ کے لئے سازگار ہے۔ اسی گراؤنڈ پر 8 سال پہلے گریم اسمتھ کی قیادت میں جنوبی افریقا نے پاکستان کو ایک اننگز اور اٹھارہ رنز سے شکست دی تھی۔ پاکستان اور جنوبی افریقا کے درمیان اب تک ہونے والے23ٹیسٹ میں سے پاکستان نے چار جنوبی افریقا نےبارہ میچ جیتے ہیں۔ سات میچ ڈرا ہوئے۔ پاکستان نے جنوبی افریقا کی سرزمین پر دو ٹیسٹ جیتے ہیں۔ جبکہ ایک میچ پاکستان اور ایک امارات میں جیتا تھا۔ پہلے ٹیسٹ کے لئے پاکستان کے ممکنہ گیارہ کھلاڑیوں کے نام یہ ہیں۔ فخر زمان، امام الحق، شان مسعود، اظہر علی، اسد شفیق، بابر اعظم، سرفراز احمد (کپتان ، وکٹ کیپر)، محمد عامر، حسن علی، یاسر شاہ اور شاہین شاہ آفریدی۔ میچ پاکستانی وقت کے مطابق دوپہر ایک بجے شروع ہوگا۔
