• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

جھاڑو پھرتے پھرتے آخری کونے تک آگیا،تمام چوروں کو ٹکٹکی لگے گی،شیخ رشید

آج کا اخبار
اہم خبریں
21 جولائی ، 2019
لاہور(جنرل رپورٹر/صباح نیوز) وزیر ریلوے شیخ رشید احمد نے کہا ہے کہ جھاڑو پھرتے پھرتے آخری کونے تک آگیا، ابھی تو کھیل شروع ہوا، آگے آگے دیکھیں ہوتا ہے کیا،تمام چوروں کو ٹکٹکی لگے گی ،مولانا فضل الرحمان وزیراعظم کا استعفیٰ لیتے لیتے چیئرمین سینیٹ تک پہنچ گئے۔ انہوں نے پریس کانفرنس سے خطاب کرتے ہوئے کہا ملک میں تمام چوروں کو ٹکٹکی لگے گی، وزیراعظم سے کہا جس جس نے قوم کا پیسہ کھایا ہے وصول کیا جائے، ابھی تو کھیل شروع ہوا ہے، آپ چیخیں مار رہے ہیں، قوم کو پہلے بھی کہا جو جتنا چیخ رہا ہے وہ ٹکٹکی کے قریب ہے، وزیراعظم سے کہا جس جس نے قوم کا پیسہ کھایا ہے وصول کیا جائے، بعض لوگوں کے وکٹ کے دونوں طرف تعلقات ہوتے ہیں۔ انہوں نے کہا کہ دنیا کے بڑے ادارے ریلوے ورکشاپوں پر سرمایہ کاری کرنا چاہتے ہیں، ٹرینوں کی تاخیر کا نوٹس لیا ہے، جلد 5 نئی ٹرینیں چلانے جا رہے ہیں، ریلوے کی مال گاڑیوں سے مقررہ اہداف سے زائد آمدن ہوئی، ریلوے نظام کی بہتری کیلئے کنٹریکٹ پر بھرتیاں کی جائیں گی، ملازمین کی مستقلی کیلئے ہدایات جاری کر دیں،6 ماہ بعد ریلوے ملازمین کی تنخواہوں میں10 فیصد اضافہ کیا جائے گا۔ وفاقی وزیر ریلوے نے مزید کہا کہ ڈالر اور تیل کی قیمتیں بڑھنے سے مشکلات ہوئیں، ہم نے5 بلین کا خسارہ کم کیا ہے، ریلوے کی زمینوں پر قائم تجاوزات کا مکمل خاتمہ کیا جائے گا۔ انہوں نے کہا کہ عمران خان کی قیادت میں ریلوے کی جتنی خدمت ہوسکی کروں گا، مال گاڑیوں سے مقررہ اہداف سے زیادہ آمدن حاصل ہوئی، بڑے ادارے ریلوے میں سرمایہ کاری کیلئے تیار ہیں۔
تازہ ترین