وزیراعظم کا پولیو کیسز میں اضافے پر تشویش کا اظہار

وزیراعظم عمران خان نے پولیو کیسز میں اضافے پر تشویش کا اظہار کردیا اور وفاقی و صوبائی حکومت کو انسداد پولیو مہم کو مزید موثر بنانے کی ہدایت کردی۔

وزیراعظم کی زیر صدارت پولیو کی صورتحال پر اجلاس ہوا، جس میں نیشنل مانیٹرنگ بورڈ نے پولیو سے متعلق 2017-18 کی رپورٹ پیش کی۔

بریفننگ میں عمران خان کو بتایا گیا کہ پولیو کے خاتمے سے متعلق حکمت عملی میں خامیوں کے باعث پولیو کیسز میں اضافہ ہوا۔

وزیراعظم نے اس پر کہا کہ پولیو کا خاتمہ موجودہ حکومت کی سب سے اہم ترجیح ہے۔

عمران خان نے پولیو اور احساس پروگرام پر عمل درآمد کےلیے مربوط حکمت عملی ترتیب دینے کی ہدایت کی۔

دوران اجلاس پاک افواج کے نمائندوں نے دور دراز علاقوں میں پولیو مہم کی مکمل حمایت کی یقین دہانی کرائی۔

اس موقع پر عالمی اداروں نے بھی پولیو کے خاتمے کےلیے حکومت پاکستان کی کوششوں کی حمایت جاری رکھنے کے عزم کا اظہار کیا۔