فرمان الہی
نماز کے اوقات
حیدرآباد،پشاور (نامہ نگار، نیوز ڈیسک)حیدرآباد میں 2بچوں میں پولیو وائرس کی تصدیق ہوئی ہے۔ تفصیلات کے مطابق محکمہ صحت کے ڈائریکٹر جنرل ڈاکٹر مسعود سولنگی نے تصدیق کی ہے کہ لطیف آباد نمبر 11کی رہائشی دس سالہ بچی رباب فاطمہ اور ہالاناکہ کے رہائشی ایک سالہ محب اللہ میں پولیو وائرس کی تصدیق ہوئی ہے۔ خیبر پختونخوا کے مختلف علاقوں میں پولیو کے مزید تین کیسز جبکہ حیدر آباد سے پولیو کے دو نئے کیسز سامنے آئے ہیں جس کے بعد صوبے میں پولیو سے متاثرہ بچوں کی مجموعی تعداد 44ہوگئی ہے جبکہ حیدر آباد سے بھی پولیو کے دو نئے کیسز سامنے آنے کے بعد ملک بھر میں پولیو کیسز کی مجموعی تعداد 58 ہوگئی ہے۔ وزیر اعلیٰ خیبرپختونخوا آج پیر سے صوبے کے 26اضلاع میں پولیو مہم کا افتتاح کریں گے ۔پولیو سے متعلق ایمرجنسی آپریشن سینٹر کے مطابق خیبر پختونخوا میں پولیوکے نئے کیسز میں ایک بنوں ،ایک ہنگو اور ایک شمالی وزیر ستان سے سامنے آیا ہے ایمرجنسی آپریشن سینٹر کے مطابق پولیو سے متاثرہ بچوں میں ایک لڑکا اور دو لڑکیا ں شامل ہیں جس کے بعد خیبر پختونخوا میں رواں سال پولیوسے متاثرہ بچوں کی مجموعی تعدا د 44ہوگئی ہے ۔ ایمرجنسی آپریشن سینٹر کے مطابق خیبرپختونخوا میں پولیو کیسز کی تعداد میں اضافے کی وجہ والدین کی جانب سے بچوں کو قطرے پلانے سے انکار ہے ۔ایمرجنسی آپریشن سینٹر کے مطابق خیبر پختونخوا میں پولیو وائرس کی صورت حال خطرناک ہوچکی ہے ۔
