نئی دلی میں مسلم کش فسادات جاری: جاں بحق افراد کی تعداد 38 ہوگئی

بھارتی دارالحکومت نئی دلی میں انتہاپسندوں کے ہاتھوں جان سے جانے والوں کی تعداد 38 ہوگئی ہے۔

غیر ملکی میڈیا کی رپورٹ کے مطابق نئی دلی کے صرف ایک علاقے گامڑی میں 100 سے زائد انتہا پسندوں نے مسلم اکثریتی علاقے پر دھاوا بول دیا۔

دارالحکومت کے علاقے موج پور، جعفر آباد ، سلام پور اور بابر پور میں سیکیورٹی اہل کار تعینات کردیے گئے۔

دہلی مسلم کش فسادات کی سماعت کرنیوالے جج کا تبادلہ

دلی مسلم کش فسادات کی سماعت کرنے والے ہائی کورٹ کے جج مرلی دھر کا تبادلہ کردیا گیا، جسٹس مرلی نے گزشتہ روز سماعت میں اشتعال انگیز تقریر کرنے والے بی جے پی لیڈروں کے خلاف ایف آئی آر درج نہ کئے جانے پر مرکزی حکومت اور پولیس کو آڑے ہاتھوں لیا تھا۔

دلی کے شمال مشرقی علاقوں میں حالات تاحال معمول پر نہیں آسکے ہیں، لوگ اب بھی خوفزدہ ہیں۔

تشدد والے علاقوں میں بھارتی سیکیورٹی فورسز کی اضافی نفری تعینات ہیں، لیکن اس کے باوجود گزشتہ رات بھی جلاؤ گھیراؤ کے واقعات رونما ہوئے۔

انتہا پسندوں کو کارروائیوں کی کھلی چھوٹ دینے والی دلی پولیس نے دعویٰ کیا ہے کہ تشدد کے معاملے میں اب تک 106 افراد کو گرفتار کیا گیا ہے اور 18 ایف آئی آر درج کی جاچکی ہیں۔