فرمان الہی
نماز کے اوقات
پاکستانی نژاد برطانوی باکسر عامر خان نے پاکستان کے واحد اولمپیئن میڈلسٹ باکسر حسین شاہ پر تنقید کے نشتر چلاتے ہوئے سوال کیا ہے کہ حسین شاہ نے پاکستان باکسنگ کے لیے کیا کیا؟
صحافیوں سے ویڈیو کانفرنس کے ذریعے گفتگو کے دوران عامر خان نے کہا کہ حسین شاہ کو پاکستان نے عزت دی اور وہ پاکستان سے نام کما کر جاپان جاکر سیٹ ہوگئے، یہاں کے باکسرز کے لیے کچھ اقدامات نہیں کیے جبکہ ان کے برعکس میں یہاں باکسرز کے لیے پیسہ لگا رہا ہوں۔
عامر خان نے یہ باتیں اس وقت کہیں جب ایک صحافی نے کہا کہ عامر خان کے نام سے اسلام آباد میں منسوب باکسنگ اکیڈمی کسی زمانے میں حسین شاہ کے نام سے منسوب تھی۔
تاہم عامر خان نے بعد میں اپنا لہجہ نرم کرتے ہوئے کہا کہ وہ حسین شاہ کی عزت کرتے ہیں، ان کی خواہش ہے کہ وہ ان کے ساتھ پاکستان میں باکسنگ کے لیے مل کر کام کریں۔
ایک سوال پر عامر خان نے کہا کہ وہ اولمپکس میں پروفیشنل باکسرز کو کھلانے کے حامی نہیں، پروفشینلز اور ایمچر باکسرز ایک ساتھ مقابلہ نہیں کرسکتے، ایسا مقابلہ ایمچر باکسرز کے ساتھ نا انصافی ہوگی کیوں کہ ایک پروفیشنل باکسر بغیر وقت ضائع کیے کسی بھی ایمچر باکسر کو چت کر دے گا۔
انہوں نے مزید کہا کہ وہ پروفیشنل باکسنگ کو اس لیے پروموٹ کرتے کیوں کہ ان کی خواہش ہے کہ باکسرز کی زندگی بہتر ہو، انہیں پیسہ ملے، ایمچر باکسنگ میں یہ پیسہ نہیں ملتا۔
عامر خان نے مزید کہا کہ وہ جلد فلپائن کے مینی پیکیو کے ساتھ فائٹ کرنا چاہتے ہیں اور اس سلسلے میں ان کی پیکیو کے مینیجر سے بھی بات چیت ہوئی ہے ، تاہم امید ہے کہ اس میچ کی تاریخ اور مقام جلد طے ہوجائے گا۔
