فرمان الہی
نماز کے اوقات
قومی احتساب بیورو (نیب) نے آمدن سے زائد اثاثہ جات کیس میں پاکستان پیپلز پارٹی کے سینئر رہنما خورشید شاہ کے اہلِ خانہ کی گرفتاری کیلئے سپریم کورٹ آف پاکستان سے رجوع کر لیا۔
نیب نے عدالتِ عظمیٰ میں خورشید شاہ کی 2 بیویوں بی بی گل ناز، بی بی طلعت، بیٹے زیرک شاہ اور بھتیجے کی ضمانت کا فیصلہ بھی چیلنج کر دیا۔
نیب نے سپریم کورٹ سے تمام ملزمان کی ضمانتیں منسوخ کرنے کی استدعا کر دی۔
نیب نے استدعا کی ہے کہ سندھ ہائی کورٹ کا 22 اپریل کا فیصلہ کالعدم قرار دیا جائے، سندھ ہائی کورٹ نے ملزمان کے خلاف شواہد کو نظر انداز کیا۔
نیب نے عدالتِ عظمیٰ سے اپنی درخواست میں کہا ہے کہ سندھ ہائی کورٹ نے کیس کے حقائق کا درست جائزہ نہیں لیا، ہائی کورٹ نے فیصلے میں سپریم کورٹ کے وضع کردہ اصولوں کو نظر انداز کیا۔
یہ بھی پڑھیئے: خورشید شاہ کی رہائی کا حکم چیلنج
نیب نے اپیل میں کہا ہے کہ خورشید شاہ نے 2005ء سے 2019ء تک آمدن سے 71 کروڑ روپے زائد خرچ کیے، خورشید شاہ اور ان کے اہلِ خانہ اپنے بینک اکاؤنٹس میں موجود 84 ہزار امریکی ڈالرز کا حساب نہ دے سکے۔
نیب نے اپنی درخواست میں یہ بھی کہا ہے کہ خورشید شاہ اور ان کے اہلِ خانہ اکاؤنٹس میں پڑے 37 کروڑ سے زائد روپے کا بھی حساب نہیں دے سکے۔
