زائرہ وسیم کی ٹوئٹر اور انسٹاگرام پر واپسی

31 مئی ، 2020

گزشتہ سال اسلام کی خاطر فلمی دُنیا کو خیرباد کہنے والی زائرہ وسیم نے ایک بار پھر سے اپنا ٹوئٹر اور انسٹاگرام اکاؤنٹ فعال کرلیا ہے۔

زائرہ وسیم نے گزشتہ دنوں ٹڈیوں کے حملوں کے بارے میں ٹوئٹ کیا تھا جس پر سابقہ اداکارہ کو شدید تنقید کا نشانہ بنایا گیا تھا، سوشل میڈیا صارفین کی تنقید کی وجہ سے زائرہ وسیم نے اپنا تصدیق شدہ ٹوئٹر اور انسٹاگرام اکاؤنٹ ڈیلیٹ کر دیا تھا لیکن حال ہی میں اُن کے ٹوئٹر اکاؤنٹ سے ایک ٹوئٹ سامنے آیا ہے۔

زائرہ وسیم کے ٹوئٹ سے اندازہ لگایا جاسکتا ہے کہ اُنہوں نے ٹوئٹر اکاؤنٹ ایک بار پھر سے فعال کرلیا ہے۔

مائیکرو بلاگنگ سائٹ ٹوئٹر پر ایک صارف نے پوچھا کہ ’زائرہ وسیم نے اپنا اکاؤنٹ کیوں ڈیلیٹ کیا تھا؟‘

صارف کے اِس سوال کا جواب دیتے ہوئے زائرہ وسیم نے اپنے ٹوئٹر اکاؤنٹ سے ٹوئٹر کرتے ہوئے لکھا کہ ’چونکہ میں بھی ایک انسان ہوں تو میں بھی باقی سب کی طرح سوشل میڈیا سے اُس وقت وقفہ لے سکتی ہوں جب میرے اردگرد شور حد سے زیادہ بڑھ جائے۔‘

زائرہ وسیم کے اِس ٹوئٹ پر متعدد ٹوئٹر صارفین نے اُن کے اِس فیصلے کی حمایت کی۔

دوسری جانب زائرہ وسیم نے اپنی انسٹاگرام اسٹوری میں بھی اپنے ٹوئٹ کا اسکرین شارٹ شیئر کیا۔

یاد رہے کہ زائرہ وسیم نے بھارت میں ٹڈیوں کے حملوں سے متعلق ایک ٹوئٹ کیا تھا جس میں انہوں نے سورۃ اعراف کی آیت نمبر 133 کا حوالہ دیا تھا۔

سابقہ اداکارہ کے اِس ٹوئٹ پر اُنہیں شدید تنقید کا نشانہ بنایا گیا تھا۔

واضح رہے کہ زائرہ وسیم نے گزشتہ سال مذہب کی خاطر فلمی دنیا کو خیرباد کہہ دیا تھا۔ زائرہ وسیم نے 2015 میں اداکار عامر خان کی بلاک بسٹر فلم ’دنگل‘ سے اپنے فلمی کیریئر کا آغاز کیا تھا۔

تازہ ترین