کورونا: رواں سال آئی سی سی کا کوئی ایونٹ ہوتا نظر نہیں آ رہا، احسان مانی

17 جون ، 2020

پاکستان کرکٹ بورڈ کے چیرمین احسان مانی کا کہنا ہے کہ کووڈ-19 کے باعث رواں سال آئی سی سی کا کوئی ایونٹ ہوتا نظر نہیں آ رہا، دسمبر تک حالات بہتر نہ ہوئے تو پی ایس ایل فائیو کے مستقبل کا فیصلہ کریں گے۔

انہوں نے کہا کہ اگر قومی ٹیم کو دورہ انگلینڈ میں ایک فیصد بھی رسک محسوس ہوا تو فیصلہ بدلنے میں وقت نہیں لگائیں گے۔

ویڈیو لنک کے ذریعے پریس کانفرنس میں پی سی بی کے سربراہ احسان مانی نے کہا کہ وہ رواں سال میں شیڈول آئی سی سی ایونٹس آئندہ سال ہوتے دیکھ رہے ہیں۔

انہوں نے کہا کہ خطرہ یہ ہے کہ بڑے ٹورنامنٹ میں کوئی کھلاڑی متاثر ہوا تو مشکلات پیدا ہوجائیں گی۔ اگلے تین چار ہفتے آئی سی سی ٹورنامنٹس کے حوالے سے بہت اہم ہیں۔

احسان مانی نے کہا کہ اگر دسمبر تک حالات بہتر نہ ہوئے تو پی ایس ایل کے بقیہ میچز سے متعلق فیصلہ کرنا پڑے گا، ڈومیسٹک کرکٹ کے بروقت شروع ہو جانے کی بھی کوئی گارنٹی نہیں۔

پی سی بی چیف نے کہا کہ ایشیا کپ نہیں ہوتا تو سب سے زیادہ نقصان نیپال، قطر اور بحرین جیسے ممالک کو ہوگا۔

چیئرمین پی سی بی کا کہنا ہے کہ انگلینڈ میں آہستہ آہستہ حالات بہتر ہورہے ہیں جو کھلاڑی انگلینڈ جارہے ہیں ان کی صحت کا مسلسل جائزہ لے رہے ہیں، وہ پرامید ہیں کہ انگلینڈ کی ٹیم 2022 میں پاکستان کا دورہ کرے گی۔

تازہ ترین