فرمان الہی
نماز کے اوقات
بھارتی فلم اسٹار سلمان خان نے اپنے مداحوں سے سوشانت سنگھ کے اہلخانہ کی اس مشکل گھڑی میں اُن کے ساتھ کھڑے رہنے کی درخواست کی ہے۔
14جون اتوار کے روز گلے میں پھانسی کا پھندہ ڈال کر خودکشی کرنے والے نوجوان بالی ووڈ اداکار سوشانت سنگھ کی موت کے بعد سے اُن کے چاہنے والوں اور دوستوں نے بھارتی فلم انڈسٹری میں اقربا پروری کے خلاف اپنی آوازیں بلند کرلی ہے اور بالی ووڈ کی ان اہم شخصیات میں سے ایک نام سلمان خان کا بھی ہے جو گزشتہ ایک ہفتے سے ٹوئٹر پر تنقید کا سامنا کر رہے ہیں۔
ایسے میں گزشتہ ایک ہفتے سے خاموشی اختیار کیے ہوئے سلمان خان کی جانب سے سوشانت سنگھ کے لیے ایک خصوصی پیغام سامنے آیا ہے۔
سلمان خان نے مائیکرو بلاگنگ سائٹ ٹوئٹر پر ٹوئٹ کرتے ہوئے لکھا کہ ’میرے اپنے تمام مداحوں سے گزارش ہے کہ وہ سوشانت سنگھ کے چاہنے والوں کی حمایت کریں اور اُن کے جذبات کا احترام کریں اور اُن کے خلاف کوئی خراب زبان استعمال نہ کریں۔‘
بھارتی اداکار نے لکھا کہ ’براہ مہربانی اس مشکل گھڑی میں سوشانت سنگھ کے اہل خانہ اور اُن کے مداحوں کے ساتھ کھڑے رہیں کیونکہ کسی پیارے کو کھو دینے کا دُکھ انتہائی تکلیف دہ ہوتا ہے۔‘
واضح رہے کہ بالی ووڈ کے آنجہانی اداکار سوشانت سنگھ راجپوت کی موت کے حوالے سے بدھ کو ایک وکیل نے بھارتی ریاست بہار کی ایک مقامی عدالت میں بالی ووڈ سپر اسٹار سلمان خان، پروڈیوسر اور ڈائریکٹر کرن جوہر سمیت آٹھ افراد کے خلاف کرمنل کمپلینٹ داخل کی تھی۔
عدالت نے کیس کی اگلی سماعت آئندہ ماہ کی تین تاریخ کو مقرر کی، دیگر افراد میں ادیتیا چوپڑا، ساجد نادیدولا، سنجے لیلا بھنسالی، بھوشن کمار، ایکتا کپور اور ڈائریکٹر دنیشن کے نام شامل ہیں۔
چیف جوڈیشل مجسٹریٹ کی عدالت میں دائر اس کیس میں ایڈووکیٹ سدھیر کمار اوجھا نے الزام عائد کیا تھا کہ ان آٹھ افراد نے ایک سازش کے تحت سوشانت کو مجبور کیا کہ وہ خودکشی کرلے، وکیل کے مطابق یہ قتل کے مترادف ہے۔
درخواست گزار وکیل نے دعویٰ کیا تھا کہ یہ افراد سوشانت کی فلموں کو ایک سازش کے تحت ریلیز نہیں ہونے دیتے تھے، اور ان افراد کی وجہ سے سوشانت کو فلمی فنکشنز میں بھی مدعو تک نہیں کیا جاتا تھا۔
