فرمان الہی
نماز کے اوقات
مسلم لیگ نون کے صدر اور قومی اسمبلی میں قائدِ حزبِ اختلاف میاں شہباز شریف کراچی کے علاقے ڈالیما میں دیوار گرنے سے جاں بحق ہونے والے افراد کے لواحقین سے تعزیت کے لیے ان کے گھر پہنچ گئے۔
اس موقع پر شہباز شریف نے جاں بحق ہونے والے افراد کے لواحقین کو امداد کی یقین دہانی کرائی۔
کراچی میں شہباز شریف نے گلشن اقبال اور ملیر سمیت مختلف علاقوں کا دورہ کیا، لوگوں کے مسائل سنے اور بارش کے باعث پیش آنے والے حادثات میں جاں بحق ہونے والے افراد کے لواحقین سے تعزیت کی۔
بعد میں صدر نون لیگ شہباز شریف اور ان کے ساتھ کراچی آئے ہوئے دیگر نون لیگی رہنما مفتاح اسماعیل کے گھر روانہ ہو گئے۔
شہباز شریف آج سابق صدر اور پاکستان پیپلز پارٹی کے شریک چیئرمین آصف علی زرداری اور چیئرمین پی پی پی بلاول بھٹو زرداری سے بھی ملاقات کریں گے۔
اس سے قبل میڈیا سے گفتگو کرتے ہوئے کراچی میں بارش سے ہوئے نقصانات پر اپوزیشن لیڈر وزیرِ اعظم عمران خان پر برس پڑے۔
یہ بھی پڑھیئے: شہباز شریف کراچی پہنچ گئے
شہباز شریف نے کہا کہ عمران خان نیازی صاحب اس وقت سیاست نہ کریں خدارا کراچی آئیں، یہ وقت سیاست کا نہیں کام کرنے کا ہے۔
انہوں نے مزید کہا کہ وفاق نے وعدے کے مطابق فنڈز مہیا کیے ہوتے اور سیاست نہ کی ہوتی تو آج یہ دن نہیں دیکھنا پڑتا۔
صدر مسلم لیگ نون نے سندھ حکومت اور تمام اسٹیک ہولڈرز کے ساتھ مل کر مسائل حل کرنے کا مطالبہ بھی کر دیا۔
