وقار یونس کے والد کے انتقال پر قومی کرکٹرز کا اظہار تعزیت

13 ستمبر ، 2020

قومی کرکٹ ٹیم کے بولنگ کوچ اور سابق اسٹار فاسٹ بولر وقار یونس کے والد کے انتقال پر قومی کھلاڑیوں کی جانب سے تعزیت کا اظہار کیا گیا ہے۔

قومی کرکٹ ٹیم کے آل راؤنڈر محمد حفیظ نے مائیکرو بلاگنگ سائٹ ٹوئٹر پر جاری کردہ اپنے پیغام میں وقار یونس کے والد کے انتقال کی خبر کو افسوسناک قرار دیتے ہوئے لکھا کہ ’اللّہ تعالیٰ آپ کے والد کو جنت الفردوس میں اعلیٰ مقام عطا کرے اور میری دلی تعزیت آپ کے اہلِ خانہ کے ساتھ ہے۔‘

فاسٹ بولر حسن علی نےاپنے ٹوئٹ میں وقار یونس کو مخاطب کرتےہوئے لکھا کہ ’اللّہ تعالیٰ آپ کے والد کو جنت الفردوس میں اعلیٰ درجات عطا فرمائے، اِس مشکل گھڑی میں اللّہ تعالیٰ آپ کو اور اہل خانہ کو قوت اور صبر عطا کرے، آمین۔‘

پاکستان کی ٹیسٹ کرکٹ ٹیم کے کپتان اظہر علی نے ٹوئٹر پر ٹوئٹ کرتے ہوئے لکھا کہ ’وقار یونس کے والد کے انتقال کی خبر سُن کر بہت زیادہ دُکھ ہوا، میری دُعا ہے کہ اللّہ تعالیٰ اُن کی مغفرت فرمائے اور اہلِ خانہ کو ہمت عطا کرے آمین۔‘

قومی کرکٹ ٹیم کے فاسٹ بولر وہاب ریاض نے بھی اپنے ٹوئٹر اکاؤنٹ پر وقار یونس کے والد کی مغفرت کے لیے دُعائیہ پیغام جاری کیا۔

واضح رہے کہ وقار یونس کے والد گزشتہ روز لاہور میں انتقال کرگئے تھے جبکہ والد کے انتقال کے وقت وقار یونس سڈنی میں موجود تھے، والد کے انتقال کی افسوسناک خبر سُنتے ہی وقار یونس فیملی سے ملے بغیر ہی سڈنی سے لاہور کے لیے روانہ ہوگئے۔