راولپنڈی (اپنے نامہ نگار سے) ذرائع کے مطابق عسکری حکام نے عمار چوک ری ماڈلنگ (توسیع) منصوبہ پر یکم دسمبر سے کام شروع کرنے کیلئے گرین سگنل دیدیا ہے ، اس منصوبہ کیلئے پنجاب حکومت کی طرف سے چکلالہ کنٹونمنٹ بورڈ کو 500ملین روپے کی رقم ریلیز ہو چکی ہے جبکہ اس منصوبے کی مجموعی لاگت 754ملین روپے ہے ، آرڈی اے ذرائع کے مطابق گزشتہ روز ایک اعلیٰ سطح کے اجلاس میں اس منصوبے کو یکم دسمبر سے شروع کرنے کیلئے کہا گیا ہے ، پہلے یہ منصوبہ آرڈی اے نے مکمل کرنا تھا تاہم بعد میں فیصلہ کیا گیا کہ یہ منصوبہ چکلالہ کینٹ بورڈ کی طرف سے شروع کروایا جائے گا ، واضح رہے کہ یہ منصوبہ پچھلے کئی سالوں سے تاخیر کا شکار چلا آ رہا تھا تاہم اب توقع کی جا رہی ہے کہ یہ جلد مکمل ہو گا جس سے ٹریفک کے مسائل حل ہو سکیں گے۔