وفاقی دارالحکومت اسلام آباد کی انتظامیہ نے کورونا وائرس کے پھیلاؤ کو مدنظر رکھتے ہوئے بازاروں اور پبلک پارکس کھلنے کے نئے اوقات جاری کردیے ہیں۔
انتظامیہ کی جانب سے حکم نامہ جاری کردیا گیا ہے، جس کا اطلاق کل 29 اکتوبر سے تاحکم ثانی ہوگا، جس کے مطابق اسلام آباد میں تفریحی اور پبلک پارکس شام 6 بجے بند کیے جائیں گے۔
انتظامیہ کے مطابق شہر میں تمام بازار، پلازے، شاپنگ مالز، ریسٹورنٹس اور کیفے رات 10 بجے بند ہوں گے۔
ریسٹورنٹس، کیفے ٹیک اوے اور ہوم ڈیلیوری کی سروسز جاری رکھ سکیں گے۔
دارالحکومت کی انتظامیہ نے شادی ہالز، سینما، تھیٹر، حجام کی دکانیں، بیوٹی پارلر بھی 10 بجے بند کرنے کا حکم دیا ہے۔
حکم نامے کے مطابق اسلام آباد کی حدود میں واقع بزنس سینٹر، اکیڈمیاں اور جمز بھی رات 10 بجے بند ہوں گے۔
انتظامیہ کے مطابق میڈیکل اسٹورز، کلینکس اور اسپتال 24 گھنٹے کھولے جاسکتے ہیں۔
حکم نامے میں پٹرول پمپس، سی این جی اسٹیشنز، کریانہ اسٹورز، پبلک ٹرانسپورٹ، ٹائر پنکچر شاپس، تندور اور بیکریاں 24 گھنٹے کھلی رکھنے کی اجازت دی گئی ہے۔