نو منتخب امریکی صدر جو بائیڈن نے اپنے ٹوئٹر کی بائیو تبدیل کردی

امریکا کے نو منتخب صدر جوبائیڈن نے صدارتی انتخابات میں کامیابی کے بعد مائیکرو بلاگنگ سائٹ ٹوئٹر پر اپنے اکاؤنٹ کی بائیو تبدیل کردی ہے۔

74 سالہ ڈونلڈ ٹرمپ کو شکست دے کر امریکا کے 46ویں صدر منتخب ہونے والے 77 سالہ جوبائیڈن نے ایک بڑا اعزاز اپنے نام کرنے کے بعد اپنے ٹوئٹر اکاؤنٹ کی بائیو تبدیل کردی ہے، جو بائیڈن نے اپنی نئی ٹوئٹر بائیو کچھ اس طرح لکھی:

امریکا کا نو منتخب صدر، ڈاکٹر بائیڈن کا شوہر، ایک قابل فخر والد اور دادا، تمام امریکیوں کے لیے بہترین ملک اور ماحول تعمیر کرنے کے لیے تیار ہے۔

دوسری جانب جو بائیڈن نے ٹوئٹر پر ایک ویڈیو شیئر کی ہے جس میں دکھایا گیا ہے کہ امریکا میں مختلف نسلوں کے لوگ اکٹھے ہورہے ہیں۔

امریکی نو منتخب صدر جوبائیڈن نے ٹوئٹر پر ویڈیو شیئر کرتے ہوئے تمام امریکیوں کا شکریہ ادا کیا اور کہا کہ ’امریکا، مجھے یہ اعزاز حاصل ہے کہ آپ نے مجھے اپنے عظیم ملک کی رہنمائی کے لیے منتخب کیا ہے۔‘

امریکا کو دنیا میں پھر قابل اعتبار بنائیں گے، جوبائیڈن

نو منتخب امریکی صدر جو بائیڈن نےجیت کے بعد ولمنگٹن میںاپنے پہلے خطاب میں کہا کہ اختلافات سے قطع نظر تمام امریکیوں کا صدر ہوں

جو بائیڈن نے کہا کہ ’ہمارے سامنے کام سخت ہوگا لیکن میں آپ سے وعدہ کرتا ہوں کہ میں تمام امریکیوں کے لیے صدر بنوں گا، پھر چاہے آپ نے مجھے ووٹ دیا یا نہیں، میں ہمیشہ آپ کا مجھ پر اعتماد قائم رکھوں گا۔‘

جو بائیڈن امریکا کے نئے صدر منتخب ہوگئے

امریکی میڈیا کا کہنا ہے کہ جو بائیڈن پنسلوانیا کے بیس الیکٹورل ووٹ حاصل کرنے میں کامیاب ہوئے ہیں، جس کے بعد ان کے الیکٹورل ووٹوں کی تعداد 273 ہوگئی ہے۔

واضح رہے کہ ڈیموکریٹ امیدوار جو بائیڈن امریکا کے 46ویں صدر منتخب ہوگئے ہیں، ریاست پنسلوانیا میں ووٹوں کی گنتی مکمل ہونے کے بعد جو بائیڈن کے الیکٹورل ووٹوں کی تعداد 273 ہوگئی۔ جبکہ اُن کے حریف ری پبلکن امیدوار اور موجودہ صدر ڈونلڈ ٹرمپ کے الیکٹورل ووٹوں کی تعداد 214 ہے۔