فرمان الہی
نماز کے اوقات
پاکستان تحریکِ انصاف (پی ٹی آئی) کراچی کے رہنما خرم شیر زمان کہتے ہیں کہ سابق صدر آصف علی زرداری کے حلقے میں لوگ بنیادی سہولتوں سے محروم ہیں۔
کراچی میں واٹر بورڈ حکام سے ملاقات کے بعد میڈیا سے گفتگو کرتےہوئے پاکستان تحریکِ انصاف (پی ٹی آئی) کراچی کے رہنما خرم شیر زمان کا کہنا ہے کہ پیپلز پارٹی 13 سال سے سندھ میں اقتدار میں ہے، یہ گیس کی بات چھوڑیں، بتائیں شہر میں پانی کیوں نہیں ہے؟
انہوں نے کہا کہ کراچی میں کچرے اور کتوں کی بھر مار ہے، جو 50 کروڑ مختص کیئے تھے وہ کہاں گئے؟ کراچی کو روم اور سکھر کو پیرس بنانے والے پہلے کراچی کی بد حالی کا تو بتائیں۔
خرم شیر زمان نے کہا کہ یہ لوگ کراچی کو ٹرانسپورٹ سروس تک فراہم نہیں کر سکے، پی پی نے سندھ میں کرپشن کا بازار گرم کیا ہوا ہے۔
رہنما پی ٹی آئی کا کہنا ہے کہ یہ لوگ سمجھتے ہیں کہ انہیں وزیرِ اعظم عمران خان این آر او دیں گے، عمران خان کی قیادت میں ملک ترقی کر رہا ہے، ملک میں مہنگائی کم ہوگئی ہے، خارجہ پالیسی بہتر ہوئی ہے۔
ان کا کہنا ہے کہ واٹر بورڈ کے حکام سے کراچی میں پانی کے مسائل سے متعلق بات کی، انہیں کراچی کے عوام کے مسائل سے آگاہ کیا ہے۔
رہنما پی ٹی آئی خرم شیر زمان کا کہنا ہے کہ واٹر بورڈ سے کراچی کے مختلف علاقوں میں لیکیجز سے متعلق بات کی، ایم ڈی واٹر بورڈ نے وعدہ کیا ہے کہ جلد لیکیجز کو بند کر دیں گے، لیکیجز بند نہ ہوئیں تو گرمیوں میں عوام کو مسائل کا سامنا ہو گا۔
