فرمان الہی
نماز کے اوقات
تمغۂ امتیاز حاصل کرنے والی اداکارہ مہوش حیات نے ماضی کی معروف اداکارہ اور شان شاہد کی والدہ نیلو بیگم کے انتقال پر اظہارِ تعزیت کیا ہے۔
مائیکرو بلاگنگ سائٹ ٹوئٹر پر جاری کیے گئے پیغام میں مہوش حیات نے کہا کہ ’میڈم نیلو جی کے انتقال کی خبر سُن کر بہت زیادہ دکھ ہوا۔‘
مہوش حیات نے کہا کہ ’اُنہوں نے اپنے کام سے اور اپنی شخصیت سے مجھ سمیت تمام فنکاروں کو بہت مُتاثر کیا ہے۔‘
اداکارہ نے کہا کہ ’ہم آج بھی میڈم نیلو جی کے نقش قدم پر چلتے ہیں۔‘
اُنہوں نے مرحومہ کی مغفرت کے لیے دُعا کرتے ہوئے لکھا کہ ’اللّہ انہیں جنت میں اعلیٰ مقام عطا فرمائے اور اُن کے اہل خانہ کو صبر عطا فرمائے۔‘
مہوش حیات نے مزید کہا کہ ’میری دلی تعزیت اداکار شان شاہد کے ساتھ ہے۔‘
واضح رہے کہ 80 سالہ نیلو بیگم دو روز قبل لاہور میں انتقال کرگئی تھیں، اداکارہ نیلو بیگم فلم ڈائریکٹر مرحوم ریاض شاہد کی اہلیہ اور اداکار شان کی والدہ تھیں جبکہ ان کا اصل نام عابدہ ریاض تھا۔
وہ کافی عرصے سے کینسر کے مرض میں مبتلا تھیں۔ اداکارہ نیلو 1940 میں بھیرہ میں پیدا ہوئیں، 1956میں فلم ’بھوانی جنکشن‘ میں بطور چائلڈ اسٹار کام کیا۔
انہوں نے کئی یاد گار فلموں میں فنِ اداکاری کے جوہر دکھائے، جن میں دوشیزہ، عذرا، زرقا، بنجارن، بیٹی، ڈاچی، جی دار، ناگن اور شیر دی بچی شامل ہیں۔
فلم ’سات لاکھ کا گانا‘ آئے موسم رنگیلے نیلو کی پہچان بنا۔
گزشتہ روز لاہور میں نیلو بیگم کی نمازِ جنازہ ادا کی گئی تھی، نمازجنازہ میں فلمی و سماجی شخصیات کی کثیر تعداد نے شرکت کی اور مرحومہ کی مغفرت کے لیے دُعا کی۔
