میں ٹھیک ہوں، جم میں ورزش کے دوران کمر پر چوٹ لگی تھی، کپل شرما

ممبئی (مانیٹرنگ ڈیسک)بھارت کے نامور کامیڈین کپل شرما نے وہیل چیئر پر آنے کی وجہ بتادی۔گزشتہ روز کپل شرما کو ممبئی ائیرپورٹ پر وہیل چیئر پر دیکھا گیا تھا اور وہ وہیل چیئر پر ائیرپورٹ سے باہر نکل رہے تھے۔ اس دوران میڈیا کے رپورٹرز اور فوٹو گرافرز سے بھی الجھ پڑے تھے۔کپل کی وہیل چیئر پر تصاویر اور ویڈیوز وائرل ہونے کے بعد مداح تشویش میں مبتلا ہوگئے تھے لیکن اب خود ہی اس کی وضاحت کردی ہے۔بھارتی میڈیا سے گفتگو میں کپل نے بتایا کہ میں ٹھیک ہوں اور جم میں ورزش کے دوران کمر پر چوٹ لگی تھی جو کچھ دن میں ٹھیک ہوجائے گی۔انہوں نے فکر کرنے پر مداحوں کا شکریہ بھی ادا کیا۔یاد رہے کہ کپل شرما کو ایک شخص ائیرپورٹ سے وہیل چئیر پر بٹھا کر لے جارہا ہے، اسی دوران جب فوٹوگرافرز نے ویڈیو بنانے کی کوشش کی تو کپل آپے سے باہر ہوگئے اور فوٹوگرافرز کو گالی دیتے ہوئے کہا کہ ہٹو یہاں سے جس پر وہاں موجود فوٹوگرافر نے ویڈیو سوشل میڈیا پر ڈالی جس میں ان کا کہنا تھا کہ کپل آپ ہمیں گالیاں دیں لیکن ہم آپ کی صحت یابی کی دعا کرتے ہیں۔خیال رہے کہ کپل شرما کا شمار بھار ت کے نامور کامیڈینز میں ہوتا ہے اور وہ مشہور ’دی کپل شرما شو‘ کے میزبان بھی ہیں۔یہ شو فی الحال آف ائیر کردیا گیا ہے اور حال ہی میں کپل کے ہاں دوسرے بچے کی ولادت ہوئی ہے۔