الحمداللّہ! میرا کورونا ٹیسٹ منفی آیا ہے: ثمینہ علوی

30 مارچ ، 2021

صدرِ پاکستان عارف علوی کی اہلیہ ثمینہ علوی کا کورونا وائرس ٹیسٹ منفی آگیا ہے۔

سماجی رابطے کی ویب سائٹ ٹوئٹر پر جاری کیے گئے پیغام میں ثمینہ علوی نے کہا کہ ’الحمداللّہ! صدرِ پاکستان ڈاکٹر عارف علوی کو درمیانے درجے کی علامات ظاہر ہورہی ہیں لیکن وہ جلد صحتیابی کے لیے پُرعزم ہیں۔‘

ثمینہ علوی نے کہا کہ ’میں نے بھی اپنا کورونا وائرس ٹیسٹ کروایا جس کے نتائج منفی آئے ہیں اور میں اس وقت قرنطینہ میں ہوں۔‘

اُنہوں نے کہا کہ ’ہم نے کورونا ویکسین کی پہلی ڈوز لگوائی تھی لیکن قوت مدافعت بننے میں تھوڑا وقت لگتا ہے۔‘

ثمینہ علوی نے عوام سے اپیل کرتے ہوئے کہا کہ ’براہِ کرم! کورونا ویکسین بھی لگوائیں اور احتیاطی تدابیر بھی اختیار کریں۔‘

واضح رہے کہ گزشتہ روز ٹوئٹر پیغام میں عارف علوی نے بتایا تھا کہ اُن کا کورونا وائرس ٹیسٹ مثبت آگیا ہے۔

صدر مملکت نے دُعا کی تھی کہ اللّٰہ تعالیٰ کورونا وائرس کے تمام متاثرین پر رحم فرمائے۔

انہوں نے کہا تھا کہ کورونا وائرس کی پہلی ویکسین لے چکا ہوں، کورونا ویکسین کی دوسری ڈوز لگنے کے بعد اینٹی باڈیز بنتی ہیں، جو مجھے ایک ہفتے میں لگنی تھی۔

تازہ ترین