فرمان الہی
نماز کے اوقات
اقتصادی رابطہ کمیٹی (ای سی سی) کی جانب سے سول آرمڈ فورسز کی استعداد بڑھانے کے لیے گرانٹ کی منظوری دے دی گئی ہے ۔
وزیر خزانہ شوکت ترین کی زیر صدارت اقتصادی رابطہ کمیٹی کا اجلاس منعقد ہوا، اس دوران ای سی سی کی جانب سے حکومت آزاد کشمیر کے لیے تکنیکی ضمنی گرانٹ کی منظوری سمیت خیبرپختونخوا کے ضلعی ہیڈکوارٹر اسپتالوں کے لیے تکنیکی ضمنی گرانٹ کی بھی منظوری دی گئی ہے، اسپتالوں کے لیے یہ گرانٹ کورونا اور دیگر آفات سے نمٹنے کے لیے ہوگی۔
ذرائع کے مطابق ای سی سی کے اجلاس کے دوران انٹرنل سیکیورٹی ڈیوٹی الاؤنس کی مد میں 19 کروڑ روپے، فرنٹیئرکور کے بقایاجات اور شہداء کے خاندانوں کے لیے 20 کروڑ41 لاکھ جبکہ وزارت دفاع کے ایگزیکٹیو محکموں کے لیے تکنیکی ضمنی گرانٹ بھی منظور کی گئی ہے۔
ذرائع کا بتانا ہے کہ اجلاس کے دوران پاکستان رینجرز پنجاب کے اخراجات کے لیے تیکنیکی ضمنی گرانٹ، وزارت داخلہ کے پائیدار ترقی کے اہداف کے حصول کے لیے فنڈز اور قومی ورثہ ڈویژن کے لیے 25 کروڑ روپے کی تکنیکی ضمنی گرانٹ منظور کی گئی ہے۔
اس کے علاوہ ایف بی آر کے لیے 15 کروڑ روپے کی تکنیکی ضمنی گرانٹ بھی منظور کر لی گئی ہے۔
ذرائع کے مطابق اقتصادی رابطہ کمیٹی نے کوہاٹ آئل ڈپو کو دوبارہ کھولنے کی منظوری دے دی ہے جبکہ پورٹ قاسم اتھارٹی کے لیے غیر ملکی انجینئرنگ کنسلٹنٹ کی تعیناتی کی بھی اجلاس کے دوران منظوری دی گی ہے ۔
ذرائع کا بتانا ہے کہ غیر ملکی انجینئرنگ کنسلٹنٹ پورٹ قاسم ماسٹر پلان کی منصوبہ بندی اور اپ گریڈیشن کا جائزہ لے گا۔
