نواز، مریم، صفدر کی سزاؤں کیخلاف اپیلوں پر سماعت کا حکم نامہ جاری

12 جون ، 2021

اسلام آباد ہائی کورٹ نے سابق وزیرِ اعظم اور مسلم لیگ نون کے قائد میاں نواز شریف، ان کی صاحبزادی مریم نواز اور داماد کیپٹن ریٹائرڈ صفدر کی سزاؤں کے خلاف اپیلوں پر سماعت کا حکم نامہ جاری کر دیا۔

اسلام آباد ہائی کورٹ کے جسٹس عامر فاروق اور جسٹس محسن اختر نے تحریری حکم نامہ جاری کیا۔

اسلام آباد ہائی کورٹ نے اپنے تحریری حکم نامے میں کہا ہے کہ عدالتی معاون اعظم نذیر تارڑ نے عدالتی فیصلوں کی نظیروں کے ساتھ دلائل دیئے۔

حکم نامے میں کہا گیا ہے کہ عدالتی معاون نے کہا کہ اس کیس میں اپیل کنندہ سابق وزیرِ اعظم اور سیاسی شخصیت ہیں، عدالت کو اس اپیل کو سنتے ہوئے احتیاط سے کام لینا چاہیئے۔

عدالتِ عالیہ نے حکم نامے میں کہا ہے کہ عدالتی معاون نے کہا کہ کسی عام غریب آدمی کا کیس ہوتا تو ایسی احتیاط ضروری نہیں تھی، ان کی غیر موجودگی میں ٹرائل سپریم کورٹ نے کالعدم کیئے ہیں۔

حکم نامے میں کہا گیا ہے کہ عدالتی معاون اعظم نذیر تارڑ کے دلائل کے مطابق اپیل بھی ٹرائل کا تسلسل ہے۔

عدالتی حکم نامے کے مطابق ایک سوال پر اعظم نذیر تارڑ نے کہا کہ عدالت مریم نواز اور کیپٹن صفدر کی اپیل سن سکتی ہے۔

اسلام آباد ہائی کورٹ نے حکم نامے میں کہا کہ عدالتی معاون نے کہا کہ جو اشتہاری ہیں ان کی اپیل التواء میں رکھی جائے یا عدم پیروی خارج کر دی جائے، سرنڈر کرنے پر نواز شریف کی زیرِ التواء اپیل سن لی جائے، خارج ہو تو وہ بحال کرا لیں۔