فرمان الہی
نماز کے اوقات
پاکستان میوزک انڈسٹری کے نوجوان گلوکار عاصم اظہر نے کہا ہے کہ عُمر شریف کے بغیر کامیڈی پہلے جیسی نہیں رہے گی۔
عاصم اظہر نے کامیڈی کنگ عُمر شریف کے انتقال پر شدید دکُھ کا اظہار کرتے ہوئے مائیکرو بلاگنگ سائٹ ٹوئٹر پر خصوصی پیغام جاری کیا ہے۔
گلوکار نے اپنے ٹوئٹ میں لکھا کہ ’عُمر شریف صاحب! آپ کے بغیر کامیڈی پہلے جیسی نہیں رہے گی۔‘
اُنہوں نے لکھا کہ ’عُمر شریف نے اپنی زندگی میں لاکھوں لوگوں کو ہنسایا اور اب میری دُعا ہے کہ وہ اللّہ تعالیٰ کے پاس بھی ہمیشہ مُسکراتے رہیں۔‘
عاصم اظہر نے مزید لکھا کہ ’اللّہ تعالیٰ! عُمر شریف کی روح کو سکون اور اس مشکل وقت میں اہلخانہ کو صبر عطا فرمائے، آمین۔‘
واضح رہے کہ لیجنڈ کامیڈین عمر شریف طویل علالت کے بعد جرمنی کے اسپتال میں انتقال کر گئے۔
اداکار عمر شریف 4 روز سے جرمنی کے اسپتال میں داخل تھے ، انہیں کراچی سے واشنگٹن علاج کیلئے پہنچایا جارہا تھا لیکن ناساز طبیعت کے باعث انہیں جرمنی کے اسپتال میں ہی داخل کردیا گیا تھا۔
لیجنڈری اداکار و کامیڈین عمر شریف کافی عرصے سے عارضہ قلب ، گردے اور دیگر مختلف بیماریوں میں مبتلا تھے۔
خیال رہے کہ عمر شریف نے اپنے کیریئر کا آغاز 1974میں 14سال کی عمر میں اسٹیج اداکاری سے کیا تھا اور 1980 میں پہلی مرتبہ آڈیو کیسٹ پر اپنے ڈرامے ریلیز کیے تھے۔
عمر شریف ٹی وی، اسٹیج اداکار، فلم ڈائریکٹر کے طور پر جانے جاتے ہیں، انہوں نے اسٹیج و تھیٹر ناصرف ملک میں بلکہ سرحد پار بھی بہت مقبولیت حاصل کی۔
انہوں نے تقریبا 5 دہائیوں تک شوبز میں کام کیا ہے اور درجنوں، ڈراموں، اسٹیج تھیٹرز اور لائیو پروگرامز میں پرفارم کیا۔
