جاپان: پٹرول کی قیمت کو بڑھنے سے روکنے کیلئے حکومت نے کونسا اقدام کیا؟

January 26, 2022

ملک میں بڑھتی ہوئی مہنگائی کو روکنے کے لیے جاپان کی حکومت نے پہلی بار پٹرول کی قیمت کو بڑھنے سے روکنے کے لیے پٹرول کی تقسیم کار کمپنیوں کو سبسڈی دینے کا فیصلہ کیا ہے۔

تفصیلات کے مطابق حکومت جاپان نے پٹرول کی بڑھتی ہوئی قیمتوں کو روکنے کے لیے ہنگامی اقدام اٹھانے کا فیصلہ کیا ہے۔ اس اقدام کے تحت تیل کے تقسیم کنندگان کو زیادہ سے زیادہ جمعرات کے روز سے سبسڈی دی جائے گی۔

جاپان کے معیشت، اور صنعت کے وزیر ہاگی یودا کواچی نے منگل کی صبح صحافیوں کو بتایا کہ ’علاقے کے اعتبار سے پٹرولیم مصنوعات کی قیمتوں میں فرق پایا جاتا ہے، اس حکومتی اقدام سے تھوک قیمتیں کم رہیں گی جس کے باعث ہر علاقہ قیمتوں میں مزید اضافہ روک سکے گا۔‘

یہ اقدام ایک ایسے وقت اٹھایا گیا ہے، جب ریگولر پٹرول کی اوسط خوردہ قیمت حکومت کی مقرر کردہ حد 170 ین یا تقریبا 1.5 ڈالر فی لیٹر سے پیر کے روز تجاوز کر گئی تھی۔

اس پروگرام کے تحت، تیل کے تقسیم کنندگان تھوک قیمتوں میں کمی کریں گے، جس کے عوض انہیں بعد ازاں سبسڈی دی جائے گی۔