چھوٹی سی میری سائیکل

January 29, 2022

محشر بدایونی

چھوٹا سا میں چھوٹا سا دِل

چھوٹی سی میری سائیکل

دو سال پہلے میں نے جب

پہلی جماعت پاس کی

یہ سائیکل انعام میں

مجھ کو مِرے ابو نے دی

اس سائیکل پر بیٹھ کر

خود مدرسے جاتا ہوں میں

ہر روز امی کے لیے

سَودا بھی لے آتا ہوں

ہو کر سوار اس پر کبھی

میں گھومتا ہوں لان میں

دکھلاتا ہوں کرتب نئے

جا کر کُھلے میدان میں

جب کم ہَوا ہو ٹیوب کی

تو خود ہی بھر لیتا ہوں میں

بگڑے اگر پُرزہ کوئی

خود ٹھیک کر لیتا ہوں میں

گدی پہ شبراتن نے رات

طوطے کا پنجرہ رکھ دیا

کہنا پڑا اُن سے مجھے

"تم نے بُوا یہ کیا کیا"

درجے میں اب کے سال بھی

اول ضرور آؤں گا میں

ابو سے اس سے بھی بڑا

انعام کچھ پاؤں گا میں

چھوٹا سا میں چھوٹا سا دِل

چھوٹی سی میری سائیکل